Nangarhar

جلال اباد (پژواک، ۸ زمرى ۹۴): د ننګرهار ولايت يو شمېر ديني علماوو او قومي مشرانو د حکومت او وسله والو طالبانو تر منځ د پيل شوو خبرو ملاتړ وکړ.
موده مخکې د افغان پلاوي له لوري پاکستان ته په سفر کې د سولې په تړاو له مقدماتي خبرو وروسته وېل کېږي چې ډېر ژر به په چين او يا هم اسلام اباد کې افغان پلاوي له طالب استازو سره نېغ په نېغه دويم پړاو خبرو ته کېني.
د ننګرهار په مرکز جلال اباد کې د زمري په ۸مه د افغان سرتېرو په ملاتړ د ديني علماوو په غونډه کې يو شمېر علماوو او مشرانو د ياد بهير ملاتړ وکړ او له ښکېلو غاړو يې وغوښتل چې خبرو ته سره کېني.

جلال اباد (پژواک، ٦  زمرى ٩٤): د ننګرهار والي د دغه ولايت د دوو ولسواليو امنيه قوماندانان له دندو ګوښه او د  تورخم تلې درې مامورين يې څارنوالۍ ته معرفي کړل.
د ننګرهار د والي وياند احمدضياء عبدالزي د زمري په ٦مه پژواک خبري اژانس ته وويل چې والي سليم خان کندوزي دغه اقدام د خلکو د پرله پسې شکايتونو له امله کړى دى.
هغه زياته کړه چې په ګوښه شوو کسانو کې د اچين او هسکې مينې ولسوالۍ امنيه قوماندانان او په تورخم کې د مالونو د وزن کولو تلې درې مامورين شامل دي.

جلال اباد (پژواک، ۵ زمری ۹۴): د ننګرهار، لغمان او کونړ واليان وايي چې د ګډو تهديدنو پر وړاندې د همغږۍ د رامنځته کولو تر څنګ يې په پوځي او ملکي برخه کې شته ستونزې له ولسمشرۍ ماڼۍ سره شريکې کړې دي.
په سرحدونو کې د پوله ساتو ځواکونو د تشکيلات کموالی، د لويو لارو نا امني، وخت ناوخت د برېښنا د مزو قطع کېدل او په حکومتولۍ کې اصلاحاتو ته اړتيا د دغو ولايتونو د چارو  پر وړاندې ننګونې دي.
د ننګرهار په مرکز جلال اباد ښار کې د زمري په ۵مه د ختيځو دريو ولايتونو واليانو، د ۲۰۱ سېلاب قول اردو قوماندان او د زون په کچه پوځي چارواکو په دې تړاو د همغږۍ غونډه را بللې وه.

جلال اباد (پژواک، ۲۵ چنګاښ ۹۴): د مشرانو جرګې د شکايتونو کمېسيون رييس  وايي چې په  ملي شورا کې د ننګرهار ولايت يو شمېر استازې د دغه ولايت په چارو کې لاسوهنې کوي.
د چنګاښ په ۲۴مه د ورځې ناوخته د مشرانو جرګې د شکايتونو کمېسيون رييس ډاکتر زلمي زابلي په مشرۍ شپږ سناتوران دغه ولايت ته راغلل، په امنيتي او سکټوري ادارو کې يې د ستونزو د جاج اخيستو په اړه يې څېړنې پيل کړې.
د ياد کمېسيون په يو شمېر ولسواليو کې نا امني، په پوهنيز سکټور کې تر يوه بريده ستونزې او د پوليسو د تشکيلات کموالی د ننګرهار ادارې پر وړاندې ننګونې بولي، خو نا امنۍ په څو ولسواليو پورې محدوده ګڼي.