Nangarhar

جلال اباد (پژواک،۱۱ تله ۹۴): د ختيځو ولايتونو د جهادي شورا مشر او د ولسي جرګې غړي حضرت علي هغه راپورونه رد کړل چې ګواکې يو شمېر وکيلان په خپلسري ډول په امنيتي برخه کې ونډه اخلي.
دا ګونګسې وروسته له هغې ډېرې شوې چې د ننګرهار ځينو وکيلانو په شينوارو ولسواليو کې د داعش د نفوذ پر ډېرېدو اندېښنه وښوده او د خپلو ولسونو په ملاتړ يې د جګړې ليکې ته د تلو اعلان وکړ.
خو جهادي مشر او د ولسي جرګې غړي حاجي حضرت علي د تلې په ۱۱مه د ننګرهار په دره نور ولسوالۍ کې قومي غونډې ته وويل چې د حکومتي سرتېرو ملاتړی دی او همکاري ورسره کوي.

جلال اباد(پژواک، ٤تله ٩٤): د ننګرهار ولايت په مرکز جلال اباد ښار کې چاودنې د ولسي جرګې د غړي انجنير عبدالغفار  په ګډون پنځه تنه  ټپيان کړل .
د ياد ولايت د امنيه قوماندانۍ وياند سمونمل حضرت حسين مشرقيوال پژواک خبري اژانس ته وويل، چې چاودنه  نن تر غرمې مخکې شاوخوا لس نيمې بجې دجلال اباد ښار څلورمې ناحيې اړوند د عيدګاه جومات شاته شوې ده.
هغه زياته کړه، چې د انجنير غفار موټر له سړک څخه تېرېده، چې په لښتي کې ځاى پرځاى شوي ماين چاودنه وکړه .

جلال اباد(پژواک،۲۹ وږی ۹۴): د ننګرهار والي د دې ولايت له ديني عالمانو څخه  غوښتنه وکړه، چې د سولې او ثبات په برخه له حکومت سره همکار شي او د وسله والو ډلو د افراطيت پر ضد مبارزه پيل کړي.
سليم خان کندوزي دا څرګندونې د وږي په ۲۹مه، په جلال اباد کې د "نشه يي توکو د مخنيوي، سوله، امنيت، ښوونه او روزنه کې د ديني عالمانو د ونډې يو ورځني سيمينار" ته وکړې.