Kabul

کابل (پژواک، د غويي لومړۍ نېټه ٩٢): د ملي امنيت شورا وايي، هېڅ بهرني هېواد ته اجازه نه ورکوو، چې د افغانستان په ټاکنو کې لاسوهنه وکړي. د ولسمشرۍ له مطبوعاتي دفتر څخه پژواک خبري اژانس ته په رالېږل شوې خبرپاڼه کې راغلي، چې نن (د غويي لومړۍ نېټه) د ولسمشر حامد کرزي په مشرۍ د ملي امنيت شورا د هېواد پر عمومي حالت، ټاکنو، له امريکا سره پر امنيتي تړون او د امنيتي ځواکونو پر اړتياوو بحث وکړ. په خبرپاڼه کې زياته شوې، د کورنيو چارو وزير ستر پاسوال غلام مجتبی پتنګ د کورنيو چارو په وزارت کې د چارو د ښه والي په موخه يوه طرحه د ملي امنيت شورا ته وړاندې کړه.

کابل ښار (پژواک ٢٩ ورى ٩٢): د ټاکنو د خپلواک کمېسيون مشر فضل احمد معنوي د کار موده تېره ورځ (د وري ٢٨مه) پاى ته ورسېده، خو نوموړى لا هم پر خپل ځاى پاتې دى.
ولسمشر حامد کرزي درې کاله وړاندې فضل احمد معنوي د ټاکنو د خپلواک کمېسيون د مشر په توګه وګوماره، چې کاري دوره يې د روانې وري مياشتې په ٢٨مه (پرون) پاى ته ورسېده.
د ولسمشر کرزي په مشرۍ د وري مياشتې په ٢٠مه په يوې مشورتي غونډه کې پرېکړه وشوه، چې د ملي شورا له لوري د ټاکنو د قانون له تصويب وروسته دې د ټاکنو د خپلواک کمېسيون نوى رييس وټاکل شي.

کابل (پژواک ٢٨ ورى ٩٢): ولسي جرګه به له ولسمشر او د ټاکنو له خپلواک کمېسيون سره په دې موخه خبرې وکړي، چې د ولايتي شوراګانو ټاکنې په روان کال کې ترسره شي.
د ولسي جرګې ځيني غړي وايي، يادې ټاکنې ځکه بايد په روان کال کې ترسره شي، چې د روان کال د سلواغې په مياشت کې د مشرانو جرګې د دوو برخو غړو د کار موده پاى ته رسيږي.
د اساسي قانون د ٨٤مې مادې له مخې، د هرې ولايتي شورا له غړو څخه يو تن د اړوندې جرګې په انتخاب، د څلورو كلونو لپاره او د هر ولايت د ولسواليو د جرګو له غړو څخه يو تن، د اړوندو جرګو په انتخاب، د درېيو كلونو لپاره د مشرانو جرګې د غړي په توګه ټاکل کېږي.

کابل ( پژواک ٢٧ ورى ٩٢ ) : مشرانو جرګه راتلونکې سه شنبې د ملي دفاع ، بهرنيو او کورنيو چارو وزيران ورغواړي ،تر څو د افغانستان او پاکستان ترمنځ د سرحدي ستونزو په برخه کې معلومات ورکړي.
پرون په کابل او ننګرهار کې چارواکو ويلي وو، چې پاکستان د ګوشتې په سرحد کې دروازه درولې او د نورو  تاسيساتو په جوړولو يې هم لاس پورې کړى دى.
دغه کار د افغانستان له سخت غبرګون سره مخ شو او د نړيوالو اصولو خلاف يې وباله .