Balkh

مزارشريف (پژواک ٢٠ وږى ٩٣): د بلخ والي عطا محمد نور وايي چې نه يواځې پر درغليو راغلى حکومت نه مني، بلکې زياتوي چې د دغه ډول حکومت پښې او لاسونه به ور مات کړو.

عطا محمد نور دغه څرګندونې د وږي په ۲۰مه د بلخ ولايت په مقام کې د شهيد اونۍ او د احمدشاه مسعود د مړينې د تلين د نمانځنې په اړه جوړې شوې غونډې ته وکړې.

په دې غونډه کې د دغه ولايت د بېلابېلو قومونو مشرانو، ځوانانو، مېرمنو، امنيتي او دولتي لوړپوړو چارواکو برخه اخيستې وه.

 
مزارشريف (پژواک ١١ وږى ٩٣): د بلخ ولايت اوسېدونکي له راتلونکي ولسمشره تر ټولو مخکې د ښې حکومتدارۍ غوښتنه کوي.
همدارنګه د وسله والو په نوم د ډلو ټپلو اېل کول، د اداري فساد له منځه وړل، له ښارونو لرې پرتو سيمو ته د پرمختګ لړۍ اوږدول او په اساسي توګه د کرنې او معارف وده د دغه ولايت د اوسېدونکو اساسي غوښتنې دي.
د دغه ولايت اوسېدونکي هم د هېواد د نورو ولايتونو په څېر د ټاکنو اړوند روانو سياسي ناندريو خورا ستړي کړي خو تمه لري چې په نږدې موده کې به دغه ناندرۍ پای مومي او افغانستان به د نوي ولسمشر خاوند شي، چې د دوی غوښتونو ته به ځواب وايي.

 
مرازشريف (پژواک  ٣  وږى  ٩٣): د  بلخ  ولايتي شورا ته نومانده فرنګيز سوګند وايي چې له يوه وسله وال بريد څخه روغه وتلې ده.
سوګند د وږي په ٣مه پژواک خبري اژانس ته وويل چې نن له غرمې وروسته د بلخ ښار اړوند سيمه کې پرې ناپېژانده موټرسايکل سپرو ډزې وکړې خو چا ته په کې زيان نه دى اوښتى.
هغه وايي، چې د کورنۍ له غړو سره په موټر کې کور ته پر لاره وه، چې ډزې پرې وشوې.
سوګند د دغه ولايت له ښځينه  فعالانو شمېرل کېږي  چې د ولايتي شورا په اوسنيو ټاکنو کې د لومړنيو پايلو پر بنسټ بريالۍ اعلان شوې ده.