د لغمان اوسېدونکي په راتلونکيو ټاکنو کې برخې اخيستنې ته چمتو دي، خو دوى له ناامنيو سرټکوي او له راتلونکي ولسمشر څخه د امنيت ټينګښت غواړي .
 د څلورو ولسواليو دغه ولايت، چې د کابل ښار ختيځ ته په  شاوخوا ١٤٠ کيلومترۍ کې موقعيت لري ، ډېرى خلک يې په کرهڼه بوخت دي .
د راتلونکيو ټاکنو په اړه دغه راپور ددغه ولايت د مرکز او  ٣ ولسواليو د ٨ اوسېدونکيو د مرکو پربنسټ جوړ شوى دى، چې ٢ يې نجونې دي .  
 دغه ولايت په ولايتي شورا کې ٩  څوکۍ لري، چې ٣ يې مېرمنو ته ځانګړې شوې دي .
روانو ټاکنو ته د ولايتي شورا لپاره ٦٠ کسانو ځانونه کانديد کړي، چې ٥ يې مېرمنې دي .
په دغه ولايت کې په دې وروستيو کې د وسلوالو مخالفينو اغېز زيات شوى او په ځينو مرکزي سيمو کې خلک د شپې پيرې کوي .
غريبکار:  امنيت راولئ
د اليشنګ ولسوالۍ د کوټالې سيمې اوسېدونکى ٢١ کلن انور وايي، چې په ولسمشريزو ټاکنو کې برخه  اخلي.
دى وايي چې په  شخصي ژوند کې يې هيڅ مثبت تغيير نه دى راغلى، خو د سيمې  امنيت يې خراب شوى دى .
 د نو موړي په وينا، دوى اوس ټوله شپه پر کورونو پيرې کوي .
 نوموړى په دې باور دى، چې امنيت بهرنيان خرابوي او بايد له هېواده وشړل شي .  
زده کوونکې : ژوند د پخوا په پرتله ښه شوى دى
د مهترلام ښار د تيرګړيو سيمې اوسېدونکې  پېغله يسرا، چې د يوولسم ټولګې زدکونکې ده وايي، چې په ټاکنو کې برخه ځکه اخلي، چې کولاى شي خپله راتلونکې وټاکي.
د هغې په وينا، په تېرو پنځو کلونو کې يې ژوند ښه شوى، له مهاجرته خلاصه شوې او پلار يې په روغتون کې پر دنده ګومارل شوى دى .
هغه زياتوي چې په تېرو پنځو کلونو کې ډېر کار شوى ، ښوونځي او سړکونه جوړ شوي دي .
 هغه وايي که له ولسمشر سره مخ شي، نو لومړنۍ غوښتنه به يې ورنه د بهرنيوسرتېرو وېستل وي.
يسرا زياتوي : ((  ټولې ستونزې همدوى ( بهرنيانو )  جوړې کړې او واک يې په خپل لاس کې اخيستى دى.))
مزدورکار: پرته له امنيته هرڅه ناممکن دي
داليشنګ ولسوالۍ د منجان کلي اوسېدونکى ٢٢ کلن طارق، چې د دوه ماشومانو پلار دى، امنيت له هرڅه مهم ګڼي .
هغه وايي : ((  که له ولسمشر سره مخ شم، نو لومړنۍ غوښتنه به مې ترې د امنيت ټينګښت وي، ځکه که امنيت نه وي، نو بې امنه ژوند هېڅ معنا نه لري.))
هغه وايي چې  په ولسمشريزو ټاکنو کې برخه اخلي، خو په ولايتي شورا ګانو کې نه : ((  د ولايتي شورا هېڅ کار معلوم نه دى. ))
دى  وايي چې پنځه کاله وړاندې يې ژوند ډېر ښه و، دوکان يې درلود، خو اوس يې د کاروبار مزه نشته .
دغه ځوان وايي چې ايران ته د مزدورۍ لپاره ځي او عمر يې په مساپرۍ کې تېرېږي .
طارق زياتوي چې  د سيمې لومړۍ ستونزه يې د برېښنا او دويمه يې د تعليمي کورسونو او پروګرامونو نشتوالى دى .
د دولت شاه و لسوالۍ اوسېدونکى: له  امريکايانو په تنګ يو
   د دولت شاه ولسوالۍ د نګراهي کلي اوسېدونکى ٤٨ کلن فتح محمد، چې ٣ ودونه يې کړي او ١١ ماشومان لري وايي، چې په تېرو پنځو کلونو کې يې ژوند خراب شوى دى.
نوموړى وايي چې ٣ زامن يې په ملي اردو کې دي، خو له ده سره  هېڅ مرسته نه کوي او نور د مزدورۍ توان هم نه لري .
دى وايي چې په کلي کې يې د امنيت دنشتوالي له امله، ډاده نه دى، چې ټاکنې دې په کې ترسره شي.
نوموړى دا هم وايي چې په کلي کې د امريکايانو پوځي هډه ده ، چې خلک ترې په تنګ دي .
هغه زياتوي : ((  د شپې له خوا د کلي خلک  خوب نه شي کولاى، ځکه چې الوتکې يې ځي او راځي. ))
دولتي مامور: امنيت راولي
د الينګار ولسوالۍ اوسېدونکى ٦٤ کلن حاجي سيف الرحمن منګل، چې ٦ زامن لري ، وايي چې په ټاکنو کې به برخه اخلي، ترڅو خپله راتلونکې وټاکي . 
هغه وايي چې له پخوا يې ژوند ښه شوى، خو امنيت خراب شوى دى . دى زياتوي چې  په تېرو پنځو کلونو کې يې په سيمه کې ډېر کارونه تر سره شوي، خو د بې کارۍ ستونزه لا هم په خپل ځاى پاتې ده.
د نوموړي په وينا، که  چېرې له ولسمشر سره مخ شي، نو لومړنۍ غوښتنه به يې ترې د امنيت ټينګښت او دبېکارۍ له منځه وړل وي .
ښوونکى: بهرنيان دې ووېستل شي
د مهترلام ښار اوسېدونکى  ٣٨ کلن فيضان الله وايي چې په تېرو پنځو کلونو کې يې ژوند هېڅ بدلون نه دى کړى.
هغه زياتوي چې دوى اوس له ناامنيو په وېره کې دي . 
فيضان  الله وويل  : ((  که له ولسمشر سره مخ شم، نو لومړنۍ غوښتنه به مې ورنه د بهرنيانو وېستل وي.))
د هغه په وينا، د همدې بهرنيانو په راتګ نا امني زياته شوې ده .
د اليشنګ اوسېدونکى: رايه ورکول ملي مسووليت دى
د اليشنګ د جراباد سيمې اوسېدونکى ٣٣ کلن عبدالقدير وايي چې په ټاکنو کې برخه اخلي او زياتوي : ((د يوه ملي مسووليت او خپلې راتلونکې  لپاره رايه ورکوم.))
هغه وايي چې په تېرو پنځو کلونو کې يې کلي هېڅ پرمختګ نه دى کړى، بلکې امنيت لا پسې خراب شوى دى . 
نوموړى زياتوي : ((  که له ولسمشر سره مخ شم، نو لومړنۍ غوښتنه به مې ورنه د امنيت ټينګښت وي .))
د چهار باغ اوسېدونکې: ټاکنې مهمې دي
د چهارباغ دسيمې اوسېدونکې ١٩ کلنه مريم وايي چې په ټاکنو کې ځکه برخه اخلي، چې د هېواد خير ور پورې تړلى دى .
 د نوموړي په وينا، د انتخاباتو له لارې خلک کولى شي، چې خپل مشر او استازى وټاکي، نو بايد ټول   په کې برخه واخلي .   
مريم  زياتوي  چې د ولسمشرۍ له کانديدانو څخه يواځې ٣ تنه پېژني .