زرنج ( پژواک ۹ زمری ۹۲ ) د نیمروز ولایت چارواکیو د ناټو ځواکونو په هوایي عملیاتو کې دیو شمیر مهمو قوماندانانو په ګډون د ۴۵ وسلوالو طالبانو دوژل کیدو ادعا وکړه.
د نیمروز والي محمد سرور ثبات د زمري په ۹مه، دشپې ناوخته پژواک خبري اژانس ته وویل چې د وسلوالو طالبانو دوو ډلو تیره ورځ د چابرجک ولسوالۍ په چهل مهریز سیمه کې پر یوې امنیتي پوستې برید کړی و، چې د پولیسو له سخت مقاومت سره مخ شول.
هغه زیاته کړه چې په دې نښته کې پولیسو ته مرګ ژوبله نه ده اوښتې، خو په ځوابي کې ۴ تنه وسلوال طالبان ووژل شول او یو شمیر نور یې ټپي شول.
ثبات وایي ، کله چې د وسلوالو طالبانو دغه دوه ډلې بیرته خپلو سیمو ته تښتیدل، نو په لاره د ناټو ځواکونو تر هوایي برید لاندې راغلل .
د والي د معلوماتو له مخې په دې هوایي برید کې ۴۱تنه وسلوال طالبان ووژل شول او یو شمیر نور يې ټپي شوي دي.
نوموړی زیاته کړه چې په وژل شویو کسانو کې د ملا فیض په ګډون یو شمیر مهم قوماندانان هم شامل دی.
هغه وایي چې ملا فیض په هلمند او نیمروز ولایتونو کې د وسلوالو طالبانو له مهمو قوماندانانو څخه وو او دوژل شويو کسانو مړي په سیمه کې پاتې دي.
ددې ولایت یوې امنیتي سرچینې چې د نوم له څرګندولو يې ډډه کوله، پژواک ته وویل چې په وژل شویو کسانو کې د حافظ غلام رسول په نامه یو بل مهم طالب قوماندان هم شامل دی.د سرچینې په وینا، ټبي طالبان د ایران د زابل ولایت روغتون ته لیږدول شوي چې د څلورو روغتیایي حالت داندیښنې وړ ښودل شوی دی.
وسلوالو طالبانو تر اوسه په دې اړه څه نه دي ویلي.
