فراه (پژواک، ١٩ دلو ٩٣): د فراه له پشتکوه ولسوالۍ تښتول شوي ٧ کسان چې پنځه يې د ښوونځي زده کونکي دي، خوشي شول.
د پشتکوه ولسوال عبدالرحيم حيدري پژواک خبري اژانس ته وويل چې دغه کسان وسله والو طالبانو تېره چهارشنبې وروسته له هغه وتښتول چې امنيتي ځواکونو له طالبانو سره د تړاو په تور يو تن ونيو.
د هغه د معلوماتو له مخې، له يادو کسانو يو يې د دې ولسوالۍ په مرکز کې د "شهداى ګمنام" لېسې ښوونکى دى او پنځه نور د همدې لېسې زده کوونکي دي.
دى وايي چې په تښتول شوو کې يو اتيا کلن سپين ږيرى هم شامل و.
د هغه د معلوماتو له مخې، له تښتول شوو کسانو څلور زده کوونکي د پشتکوه د مرکز اړوند د "دزدباد" کلي او پاتې درې نور د کاظم اباد کلي اوسېدونکي دي.
حيدري وايي چې دغه کسان تېره ورځ ماښام مهال د سيمې د مخورو په منځګړيتوب خوشي شوي دي.
د "دزدباد" د کلي اوسېدونکى محمد وايي چې ياد ٧ کسان د پشتکوه ولسوالۍ د امنيت د امر همايون خپلوان دي.
د هغه په وينا، هغه کس چې طالبانو يې په بدل کې دغه ٧ تنه تښتولي وو، همايون نيولي وو.
د ده د څرګندونو له مخې، طالبانو ياد کسان خوشي کړي، خو د حکومت له خوا نيول شوى کس تر اوسه نه دى خوشى شوى.
هغه وويل چې طالبانو ياد ٧ تنه شکنجه کړي نه دي.
وسله والو طالبانو تر دې دمه په دې اړه څه نه دي ويلي.
