کندهار (پژواک، ١٧ لړم ٩٣): د کندهار د ولايتي شورا د نوو غړو د لوړې مراسم د دغه ولايت د ولايتي شورا د غونډو په تالار کې ترسره شول.
په مراسمو کې د کندهار والي ډاکتر توريالي ويسا، امنيه قوماندان مل پاسوال عبدالرازق، برياليو وکيلانو، د يوناما استازو، قومي مشرانو او نور ګډون کړى و.
د کندهار والي د ولايتي شورا له نوو غړو وغوښتل چې د ښو وکيلانو په توګه ځانونه ثابت کړي او د حکومت او خلکو تر منځ اړيکې پياوړې کړي.
هغه زياته کړه، د ولايتي شورا غړي بايد پر دې پوه شي چې هغوى اجرائيوي ځواک نه دي، بلکې يوه مشورتي ډله ده چې د خلکو د ستونزو د هواري او د ادارو د نظارت په موخه کار کوي.
نوموړي دغه راز له وکيلانو وغوښتل چې هغوى بايد ناقانونه کړنو او د ځمکو د غصب پر وړاندې ودرېږي، نه دا چې د هغو کړيو او کسانو د حمايې لپاره ودرېږي چې غصب کوي او يا هم ناقانونه کړنې ترسره کوي.
د کندهار د ولايتي شورا غړي حاجي سيد جان خاکرېزوال چې د درېيم ځل لپاره ولايتي شورا ته بريالى شوى، په خپله وينا کې له وکيلانو د يووالي غوښتنه وکړه.
هغه دغه راز ټينګار وکړ چې وکيلان بايد په هر حالت کې د خلکو د ستونزو د حل لپاره کار وکړي او له خپلو شخصي ګټو تېر شي.
د کندهار د ولايتي شورا يوې ښځينه غړې سرينا فيضي له پژواک خبري اژانس سره د خبرو پر مهال خوښي وښوده چې دې شورا ته بريالۍ شوې او خلکو ورباندې باور کړى دى.
نوموړې ژمنه وکړه چې په ولايتي شورا کې به د ښځينه وو استازيتوب کوي او د هغوى د ستونزو د هواري لپاره به کار کوي.
د کندهار د ولايتي شورا لپاره د ٧ ښځو په ګډون شاوخوا ٨٠ تنو ځانونه کانديد کړي وو چې شل سلنه يې نوي ځوانان او پاتې نور د ولايتي شورا پخواني غړي، قومي مشران او مخور وو.
په تېرو دوو دورو کې د کندهار ولايتي شورا د غړو ټول شمېر ١٥ تنه وو چې ١١ يې نارينه او ٤ يې ښځې وې، خو اوس دغه شمېر ١٩ تنو ته لوړه شوى چې ١٥ يې نارينه او ٤ يې ښځې دي.
د کندهار د ولايتي شورا د برياليو کانديدانو په نوملړ کې د دوو وژل شوو نوماندانو حشمت خليل کرزي او خان محمد افغان نومونه هم راغلي وو.
حشمت خليل کرزى د زمري په ٧مه د کندهار په ډنډ ولسوالۍ کې په خپل کور (حشمت کلا) کې د اختر د مبارکۍ په پلمه د يوه تن له خوا په ځانمرګي بريد کې ووژل شو او خان محمد افغان د چنګاښ په ٧مه د کندهار ښار په حضرت جي بابا سيمه کې د تلاشۍ پر مهال د پوليسو له لوري ووژل شو.
خو وروسته د ټاکنو د خپلواک کمېسيون له خوا د برياليو نوماندانو په نوملړ کې د يادو وژل شوو نوماندانو پر ځاى دوه نور نوماندان عطا الله عطا او سيداحمد سېلاب ور شامل کړل.
