د کرنې په برخه کې لاندې پروګرامونه لرو: - د کورني توليد ملاتړ. - کروندګرو ته د کرنيزو او اصلاح شوو تخمونو او کيمياوي سرو ورکول. - دکرنيزو کوپراتيفونو رامنځته کول او ملاتړ. - په ټولو ولايتونو کې د سړو خونو جوړول او پراختيا. - د کرنې په برخه کې له خصوصي سکتور ملاتړ او د اړينو اسانتياوو رامنځته کول.

له تاسې سره موافق يم، چې کرنه زموږ يوه مهمه اقتصادي سرچينه ده، په حقيقت کې افغانستان يوکرنيز هېواد دى، په ښارونو کې په مصنوعي ډول د ژوند کچې اوچتېدلو، د لومړنيو توکو، د اړتيا وړ کاليو کرايو او د بيو صعود زموږ د هېواد د کروندګرو او مالدارو ژوند له اقتصادي مضيقې سره مخ کړى دى. زموږ هڅه داده چې په لومړي ګام کې د پلور له اړخه د کرنيزو محصولاتو او کروندګرو د کورنيو د عايداتو يو ټاکلى تناسب رامنځته شي،لکه څرنګه چې کرنيز محصولات د کروندګرو د کورنيو د اړتياوو يوه برخه پوره کوي. لا هم تر وخت وړاندې ده، چې د کرنې په عصري کولو خبرې وکړو، په دې برخه کې کار کول کلونه وخت نيسي، خو بايد کار له دې برخې پيل شي او ترې وړاندې له کروندګرو سره مرسته وشي، چې د ځمکو نه د ګټې اخيستنې چاره غوره شي. د خړوبولو سيستم تنظيم شي، د غوره کيفيت لرونکې سرې ووېشل شي، له نباتي ناروغيو سره مقابله وشي،موږ په خپل پروګرام کې صنعتي توليد له کرنيزو محصولاتو څخه په نظر کې نيولى دى، د بېلګې په ډول، د سردرختۍمحصولات د مربا پر ډولونو او نورو بدلول؛ په دې برخه کې هم خلکو ته کار پيدا کېږي او هم کولى شو چې ددغو توليداتو يوه برخه له هېواده بهر صادره کړو.