د غور ولايت يو شمير اوسېدونکي له بېکارۍ، د ښوونځيو له کمښت او صحي خدمتونو له نشتوالي څخه رنځ وړي، خو بيا هم دې ته چمتو دي، چې په راتلونکيو ټاکنو کې ګډون وکړي.
د غور مرکزي ولايت له کابل ښار څخه د۹۸۰ کيلومترو شاوخوا ليرې پروت دی او ۹ ولسوالۍ لري.
دغه ټاکنيز راپور د روانې مياشتې په درېيمه اونۍ کې د ٣ ښځو او ٦ نارينه وو د مرکو پربنسټ، چې د مرکز او ٤ ولسواليو اوسېدونکي دي، برابر شوی دی.
د غور ولايتي شورا ۱۵ څوکۍ لري، چې ٤ يې ښځو ته ځانګړې شوې دي، د دغې شورا راتلونکيو ټاکنو ته ۷۵ کسان کانديد شوي، چې ٦ يې ښځې دي.
کليواله: ښوونځی او کلينيک نه لرو
۳۱ کلنه نګينه د د دولت يار ولسوالۍ د دهمرده سېمې اوسېدونکې، چې تر اوم ټولګي پورې يې درس ويلی، د ښوونځيو له کمښت او تعليمي ستونزو څخه شکايت لري.
د دې په وينا، د کلي ښوونځی يې ودانۍ نه لري او ماشومان په خېمو کې درس وايي، چې د ګرمۍ له امله ناروغان کېږي.
دا همداډول وايي چې په سيمه کې ېې يو کلينيک دی، خو درمل په کې نشته او يو ډاکټر لري، چې دی هم ډېری وخت غير حاضر وي.
خو نګينه ټولې ښځې په ټاکنو کې ګډون ته رابولي.
دې زياته کړه: (( بايد ټولې ښځې په ټاکنو کې ګډون وکړي، ترڅو وکولی شي يو عادل، زړه سواند او مسلمان ولسمشر وټاکي، چې دښځو حقونو ته پام وکړي او غوښتنو ته يې احترام ولري.))
موټر چلوونکی: پوليس پيسې غواړي
۲۵ کلن محمد نسيم د دولينې ولسولۍ اوسېدونکی د بس موټروان دی، دی وايي چې ژوند يې د خوراکي توکيو دبيو د لوړوالي له امله، له کال څخه بل ته لا خرابېږي.
دی زياتوي چې د سيمې سړک يې خام  دی، موټر يې زر خرابېږي او ګټه يې بېرته د موټر په جوړولو لګېږي.
همدارنګه ادعا لري، چې پوليس ترې په بېلا بېلو بانو پيسې  اخلي.
دغه چلوونکي، چې په تېرو ټاکنو کې يې برخه اخيستې وه، اوس دې کار ته نه دی حاضر.
ده په دې اړه وويل: ((په تېرو ټاکنو کې مې رايې ورکولو په ژوند کې کوم مثبت بدلون نه دی راوستی.))
دولتي مامور: کار شته دی، خو معاش لږ دی
محمد سردار اميري، چې ۳۴ کاله عمر لري، د چخچران مرکز د دهن کاسي سيمې اوسېدونکی دی.
دی وايي چې ٥ کاله وړاندې کارونه  نه و، خو اوس په دولتي ادارو کې کار شته، مګر معاش يې کم دی او بسنه نه کوي.
دغه دولتي مامور د سړکونو له  کمښت او خرابۍ څخه شکايت لري او وايي، چې ډېری کلي سړکونه نه لري او کوم  سړکونه، چې شته  هم، خامه او خراب دي .
دی په دې اړه چې ولې په ټاکنو کې برخه اخلي؟ وويل: ((د مثبت بدلون، سالمې ادارې او له فساد څخه د پاکې ادارې لپاره.))
دی وايي چې په ٥ تېرو کلونو کې يې په کلي کې د حکومت له خوا هېڅ کار نه دی شوی.
نالوستې ښځه: له وېرې په ټاکنو کې ګډون نه کوم
۴۲ کلنه ګل فېروزه، د چخچران د بادګان کلي اوسېدونکې وايي چې په تېرو ٥ کلونو کې يې په ژوند کې هېڅ مثبت بدلون نه دی راغلی.
دا اندېښمنه ده چې ګواکې ټاکنې به په سم ډول ترسره نه شي او بيا به جګړې پيل شي.
فېروزې په دې اړه چې په ټاکنو کې برخه اخلي؟ وويل: ((نه، ځکه وېرېږم، چې د ټاکنو په ورځ وضعيت خرابه نه شي.))
دغه مېرمن له راتلونکي ولسمشر غواړي، چې په سيمه کې يې سړک، ښوونځي او پلونه جوړ کړي او طالبان، چې د درس ويلو مزاحمت کوي د باندې وباسي.
ځوان: ژوند لږ څه ښه شوی دی
۲۰ کلن نور اغا د مرکز اوسېدونکی، چې تازه له دولسم ټولګي فارغ شوی دی. دی د اوسني حکومت له کار څخه خوښ دی او وايي: ((په سيمه کې مو ښوونځي جوړ شوي او ماشومان ښوونځيو ته ځي.))
نور اغا، چې د ۷ کانديدانو له نومونو سره بلد دی وايي، چې داسې يو کانديد يې په پام کې دی، چې د راتلونکي لپاره ښه پلان ولري او وکولی شي د اختلاس او رشوت مخه ونيسي.
نوراغا وايي چې په اوسني حکومت کې د نجونو لپاره ښوونځي پرانېستل شوي او کولی شي، چې درس ووايي. له دې  سره سره، چې ښوونځي ودانۍ، مسلکي ښوونکي او پوره کتابونه، نه لري.
دغه ځوان وايي چې له راتلونکي ولسمشر بيا جوړونه اوامنيت غواړي.
د معارف مامور: مسلکي ښوونکي نشته
۵۰ کلن نظام الدين نوري د تيوره ولسوالی اوسېدونکی او د همدې  ولسوالۍ د معارف رييس دی.
نوري وايي چې د ښوونکيو معاش کم دی، له همدې امله مسلکي او د لوړو زده کړو لرونکي ښوونکي نه غواړي، چې په کم معاش د ښوونکي دنده ترسره کړي.
ده همدا ډول د درسي کتابونو، د ښوونځيو د ودانيو، د سړکونو او کلينيکونو له کمښت څخه شکايت وکړ.
نوري وايي چې په ټاکنو کې ګډون کوي او داسې يو کانديد ته به رايه ورکړي، چې د اقتصادي او بنسټيزو پروژو پروګرامونه ولري.
دی وايي چې په سيمه کې يې دکليو دپراختيا وزارت، د ملی پيوستون د پروګرامونو له لارې ځينې ټولګټې پروژې لکه (د اوبو د څاګانو کېندل، د استنادي دېوالونو جوړول، د فرعي او.... سړکونو جوړول) پلي شوې دي.
د هټيوالو د اتحاديې رييس:  د تجارت د پرمختيا زمينه دې برا بره شي
د چخچران اوسېدونکی نظر محمد وايي چې د تېرو ٥ کلونو په پرتله يې ژوند ښه شوی، خو دا حکومت نه دی ښه کړی، دی خپل شخصي کاروبار کوي.
دی په ټاکنو کې ګډون  نه کوي او باوري دی، چې د ولس جمهور رييس يې د خلکو رايه نه، بلکې د بهرنيانو ملاتړ ټاکي.
نظر محمد د سړکونو، برېښنا، د څښلو اوبو نشتوالی او فقر او بېکاري دسيمې لويې ستونزې بولي.
ده دخپل کلي د ستونزو په اړه وويل: (( فقر او بېکاري ډېر شوي دي او بيې هم لوړې ختلې دي، خلک د غذايی توکيو د رانېولو وس نه لري.))
نظر محمد زياته کړه چې لومړۍ غوښتنه يې له راتلونکي ولسمشر څخه دا ده، چې يو عادل او له فساد څخه پاک حکومت رامنځ ته کړي.
کارګر: په ژوند کې مې هېڅ مثبت بدلون نه دی راغلی
۲۹ کلن محمد قربان  دچارصدې ولسوالۍ اوسېدونکی وايي، چې ٥ کاله مخکې يې هم په ايران کې مزدوري کوله او اوس هم په همغه هېواد کې مزدوري کوي.
دی وايي چې که په خپل هېواد کې يې کار پيدا شي، نو دباندې به هېڅ لاړ نه شي، ځکه دباندې تلل مساپري او ډېر لګښت غواړي.
دی د سړک او کلينيک نشتوالی او بېکاري د خپلې سيمې لويې ستونزې بولي.
دغه ځوان وايي چې له کلي تر ولسوالۍ يې سړک نشته او خلک ٣ ساعته پلی مزل کوي.
دی د رايې ورکولو کارت لري، خو وايي چې په سيمه کې يې د رايې ورکولو ځای نه دی جوړ شوى او نه شي کولی، چې ګډون وکړي.
دغه ځوان د کانديدانو پر شعارونو باور نه لري او وايي، چې دوی د رايې لاسته راوړلو لپاره شعار ورکوي، خو هېڅ کار به ونه کړي.
د مياشتنۍ مسوول مدير: غواړم په خپله رايه بدلون راولم
ليدا عرفاني د شهروند مياشتنۍ مديره، چې تر دولسم ټولګي پورې يې زده کړې کړې او د ولايت په مرکز کې اوسېږي وايي، چې د پام وړ کاندی يې داسې يو څوک دی، چې تحمل ولري، فساد له منځه يوسي او د ښو پروګرامونو لرونکی وي.
دا په ټاکنو کې برخه اخلي او وايي: ((زه غواړم د خپلې رايې له لارې استبداد ته د پای ټکی کېږدم.))
دا د خپل  ولايت لويې ستونزې د سړک نشتوالی، بېکاري او فقر بولي.
دا له راتلونکي ولسمشر څخه د عادل نظام او ژمنې کابينې غوښتونکې ده، ترڅو د خلکو ستونزو ته پام وکړي.
ليدا وايي چې په اوسني حکومت کې د کار څښتنه شوې او همدا ډول يې په سيمه کې پلونه او  دکليو سړکونو جوړ شوي دي.