د ننګرهار د شېرزادو ولسوالۍ زلزله ځپلي وايي چې که څه هم شوې ژمنې  ورسر ه نه دي عملي شوي ، خو په راتلونکيو ټاکنو کې برخه اخلي او له راتلونکي ولسمشر څخه د خپل ژوند او ستونزو حل ته پاملرنه غواړي .
 د شيرزادو ولسوالۍ د جلال آباد ښار لوېديځ ته په شاوخوا ٥٠ کيلومترۍ کې د سپين غره په لمنه کې پرته ده .
په دغې ولسوالۍ کې د روان کال د وري په وروستيو کې قوي زلزله وشوه، چې له امله يې ٢٠ تنه ووژل شول ، ٥٢ ټپيان ، ٣٠٠ کورونه ړنګ په سلګونو نور زيانمن او ٦٠٠ څاروي  مړه شول .  
 دغه غرنۍ سيمه، چې د کر ځمکې يې کمې دي او په ځينو سيمو کې  په ژمي کې تر يو نيم متر پورې واورې اوري  ، اوسېدونکي يې بيوزله او بېکاره دي .
له زلزلې وروسته له دغې سيمې سره د حکومت او يو شمېر موسسو له خوا د کورونو د بيا جوړولو، خوراکي او نورو اړيکو توکيو ژمنه شوې وه ، خو زلزله ځپلي وايي چې تراوسه ورسره ، دغه ژمنې پوره  نه دي عملي شوي .
 د راروانو ټولټاکنو په اړه لاندې راپور ددغې ولسوالۍ د  اتو اوسېدونکيو د مرکو په اساس چمتو شوى، چې يوه يې مېرمن ده .
سرتېرى : سر پناه غواړو
دشېرزادو ولسوالۍ د ميرګټ خېلو اوسېدونکى ٢٢ کلن اسماعيل چې د ملي اردو سرتېر ى دى  او تازه يې واده کړى وايي چې په زلزله کې يې  اته کلن ورور ( سميع الله ) له لاسه ورکړى  او کور يې ړنګ شوى دى .  
د نوموړي په وينا، په لومړي سر کې ورسره ډېرې ژمنې کېدې ، خو ژمنې ورسره پوره نه شوې او کورونه يې هماغه شان ړنګ پراته دي .
اسماعيل چې ديوې  ٢٣  کسيزه کورنۍ غړي دى ، وايي چې په دومره وخت کې يې ايله دومره وس پيدا کړى ، چې يوه خونه جوړه کړي او نوره کورنۍ يې اوس هم په خيمو کې اوسېږي . 
هغه زياتوي ، چې دوى ته يواځې د درملو مرسته شوې او بس .
هغه زياتوي چې په ټاکنو کې په دې موخه رايه ورکوي ، چې خپل ملاتړ له دولت نه وښيي او داسې چاته رايه ورکړي، چې د دوى ژوند ته پاملرنه وکړي.
هغه زياتوي چې که له ولسمشر سره مخ شي، نو لومړنۍ غوښتنه به يې ترې د سرپنا جوړول وي.
کليواله مېرمن : کور راته جوړکړئ.
  د کوديخېلو سيمې يوه کليواله ٤٨ کلنه  شاه بي بي ، چې په زلزله کې يې دوه لمسيان له لاسه ورکړي، وويل چې تر دې دمه ورسره هېچا هم داسې مرسته نه ده کړې ، چې  د دوى کور پرې ودان شي.
دغه مېرمن چې کورنۍ يې ١٣غړي لري ، وايي چې کور يې ويجاړ پروت دى او دوى په خيمو کې اوسېږي .
هغه  زياتوي چې  تېر ځل يې رايه ورکړې وه او بيا هم رايه ورکوي، خو دا ځل  داسې چاته رايه ورکوي ، چې کور ورته جوړ کړي، ځکه چې سوړ ژمى را روان دى .
شاه بي بي وايي چې که له ولسمشر سره مخ شي، نو لومړنۍ غوښتنه به يې ترې د سرپنا جوړول وي.
قومي مشر: امنيت راولئ.
د سيمې يوقومي مشر او پخواني جهادي قوماندان  ٦٢ کلن ضابط ظاهر ، چې په زلزله کې يې کور ړنګ شوى وايي چې له دوى سره چې کومې وعدې شوې وې يوه يې هم عملي نه شوه.
د نوموړي په وينا، له دوى سره حکومت او يو شمېر موسسو ژمنې کړې وې چې کورونه به يې رغيږي،ژوند ته به يې پاملرنه کېږي او وراوښتى زيان به ورکول کېږي .
 د نوموړي  د معلوماتو له مخې، له دوى سره د ننګرهار د ولايت د مقام له خوا وعده شوې وه ، چې د متحده عرب اماراتو  په مر سته به ورته کورونه جوړېږي ، چې  جوړ نه شول .
  د هغه په وينا، ولسمشر حامد کرزي  چې کله سږ کال د مجاهدينو د بري د نمانځلو کلنى جشن ( د غويي  ا تمه ) لغو کړ نو ژمنه يې وکړه چې جشن ته بېل شوي مصارف به زلزله ځپلو او د بدخشان سيلاب ځپلو ته ورکوي ، چې ورنه کړل شول .
هغه زياته کړه :  (( زموږ ژوند ته هېچا هم پاملرنه ،نه ده کړې،سړه او توده مو په خيمو کې تېره کړه . ))
د نوموړي  په وينا، له دوى سره ډېر کمې او نمايشي مرستې شوې دي .
ظاهر وايي چې په تېرو ټاکنو کې يې هم برخه اخيستې وه او په دې ټاکنو کې هم په دې موخه برخه اخلي، چې خپل سرنوشت وټاکي .
د هغه پر وينا ، که له ولسمشر سره مخ شي، نو د امنيت د ټېنګښت غوښتنه به ترې وکړي.
دى زياتوي : (( د امنيت نشتوالى دى چې زموږ ژوند يې تريخ کړى،که امنيت وى ، نو په ډاډه زړه به راته موسسو او ټولنو کارونه کول او ژوند به مو له ګواښ سره نه و مخ.. ))
د موسسې کارکونکى :  په ژمنو دې عمل وشي
د شېرزادو ولسوالۍ د کوديخېلو سيمې اوسېدونکى اته ويشت کلن يارمحمد، چې د درېيو ماشومانو پلار دى ،  په يوې بهرنۍ موسسه کې کار کوي  .
هغه وايي چې  د نا امنۍ له وېرې نه شي کولاى په ډاډه زړه کورته لاړشي.
دى هم وايي چې په زلزله کې وران شوى کور يې ړنګ پروت دى او د پام وړ مرسته ورسره نه ده شوې .
د هغه د معلوماتو له مخې، په ټاکنو کې برخه اخلي ، څو په هېواد کې يو سالمه او پاکه اداره رامنځ ته شي او امنيت ټينګ شي .
ده وويل چې په تېرو ټاکنو کې يې هم په دې موخه برخه اخيستې وه، چې ورسره ډېرې ژمنې هم شوې وې، خو عملي بڼه يې غوره نکړه .
د هغه په وينا، دا ځل به داسې چاته رايه ورکړي ، چې په خپلو ژمنو وفا وکړي .
د دارالمعلمين استاد: امنيت راولئ.
د شېرزادو ولسوالۍ د مرکي خېلو سيمې ٣٠ کلن اوسېدونکى شير حسن کمالزى ، چې دوه ماشومان لري او دننګرهار  په عالي دارالمعين کې استاد دى ، کور يې ړنګ شوى او اوس  په جلال آباد ښار کې اوسېږي .
دى وايي چې  د (  L G C D  ) ادارې  له لوري ورته دکورنو جوړولو ژمنه ورکړل شوې وه ، خو تر اوسه ، هيڅ نه دي شوي .  
هغه وايي چې رايه په دې موخه ورکوي ، چې خپله راتلونکې وټاکي .
دغه استاد زياتوي چې که له ولسمشر سره مخ شي ، نو د ډوډۍ او نورو غوښتنو نه تېرېږي او يواځې د امنيت راوستو غوښتنه به ترې کوي.
کمالزى وايي چې نا امني ده ، چې خلک يې يو پر بل بې باوره کړي،په ډاډه زړه خلک نه شي ګرځېدلى او نه موسسې او دولت کولاى شي، چې په شېرزادو او نورو سيمو کې پروژې پلې کړي  .
بزګر : دا ځل په ټاکنو کې برخه نه اخلم
 د شېرزادو ولسوالۍ د کوديخېلو سيمې يو بزګر ٤٠  کلن مصري خان وايي چې د زلزلې له امله يې کور ړنګ شوى او د ده په ګډون يې دوه ماشومان هم ټپيان شوي دي.
هغه وايي  چې تر اوسه يې د ماشومانو له ذهنه د زلزلې ويره نه ده لرې شوې .
دغه بزګر دا ځل په ټاکنو کې برخې اخيستنې ته زړه نه ښه کوي او دا ځکه چې په وينا يې  دحکومت له لوري له دوى سره شوې ژمنې نه دي عملي شوي . 
دى وايي : (( په تېرو ټاکنو کې مې په دې خاطر رايه ورکړې وه ، چې وطن جوړ شي او ژوند مو ښه شي، خو ژوند مو ښه نه شو او نا امني ورځ په ورځ زياتيږي ، څوک راسره مرستې نه کوي، کوکنار مو بند کړي، خو ژمنې راسره نه پوره کېږي. ))
ښوونکى : امنيت راولئ.
ښوونکى مختار ، چې ٥٤ کاله عمر لري اود نهو اولادونو پلار دى ، د مرکي خېلو کلي  اوسېدونکى دى.
  مختار چې په زلزله کې يې کور ړنګ شوى او په يوه بل کلي کې اوسېږي ، وايي چې ستونزو ته يې هيڅ  پاملرنه ، نه ده شوې .
نوموړى زياتوي چې موجوده حکومت د شېرزادو ولسوالۍ ته هيڅ پاملرنه ، نه ده کړې، نو داځل به داسې کانديد ته رايه ورکړي ، چې ددوى ستونزې حل کړي .
هغه له نا امنيو سرټکوي او وايي چې حتى خلک له دې ويرې چې ونه وژل شي د ماخوستن او سهار  لمانځه لپاره جومات ته نشي تلى .
دده په وينا، په سيمه کې يې وسلوال کسان دي او خلک ترې په وېره کې دي .
د نوموړي د څرګندونو له مخې ، په همدې موخه دى له راتلونکي ولسمشره ډاډه امنيت غواړي .
ملک: اساسي ستونزه د کور نشتوالى دى
د شېرزادو ولسوالۍ دکوديخېلو يو ملک سليم چې په تېره زلزله کې يې دوه واړه لمسيان  او يو  ٢٢ کلن زوى  وژل شوي ، کور يې ړنګ شوى او اوس په خيمه کې ژوند کوي .
 دغه ملک زياتوي چې له دوى سره د خيمو ، درملو او لږه اندازه خوراکي توکيو مرستې شوي، خو اساسي  مشکل يې د کور بيا جوړول دي .
 هغه وايي چې په ر اتلو نکيو ټاکنو  کې برخه اخلي او له ولسمشره غواړي چې ددغه شان طبعي افاتو ځپلې کورنۍ له پامه ونه غورځوي .