ستر جنرال بسم الله خان محمدي دغه څرګندونې خوست ته د وري په ١٠مه د خپل سفر په ترڅ کې وکړې.
په دې تړاو جوړې شوې غونډې کې د نوموړي په ګډون د خوست والي عبدالجبارنعيمي، امنيتي چارواکو، په ملي شورا کې د خوست استازو او د دغه ولايت د ټاکنو د دفتر مسوولينو برخه لرله.
بسم الله خان محمدي وويل، چې په ټول هېواد په ځانګړي ډول په خوست ولايت کې د ټاکنو د سمو ترسره کېدو لپاره بشپړ چمتووالی لري او د هر ډول ناامنيو د رامنځته کېدو مخه به ونيسي او چا ته به اجازه ورنه کړي، چې ټاکنې ګډوډې کړي.
نوموړي په خوست کې د ټولو امنيتي ارګانونو تر منځ د ښې همغږۍ او رهبرۍ پر بنسټ د رامنځته شوو پرمختګونو او ډاډمن امنيت ستاينه وکړه او ويې ويل، چې د خوست په مرکز او ولسواليو کې يې د رڼو، ازادو او عادلانه ټاکنو لپاره بشپړ چمتوالى نيولى او په دې برخه کې يې ځانګړي نوښتونه کړي دي.
بسم الله خان محمدي رڼې او ازادې ټاکنې د هېواد د راتلونکي برخليک په ګټه يادې کړې او پر دې يې ټينګار وکړ، چې ولس بايد پرته له کومې وېرې او امنيتي ستونزې په ټاکنو کې پراخ ګډون وکړي او د رايې اچونې مرکزونو ته لاړ شي.
نوموړي د امنيتي ارګانونو مسوولينو ته سپارښتنه وکړه، چې شپه او ورځ خپلې هڅې زياتې کړي، نور هم امنيتي حالت ډاډمن او ولس وکولى شي په ټاکنو کې پراخ ګډون وکړي.
د خوست والي عبدالجبار نعيمي د ملي د فاع وزير ته د ټاکنو لپاره د ډاډمن امنيت لپاره د ټينګو امنيتي تدابير په اړه معلومات ورکړل او ويې ويل، چې په دغه ولايت کې د ټاکنو په مخ کې هيڅ امنيتي ستونزې نه لري.
والي نعيمي زياته کړه، چې د خوست په مرکز او ولسواليو کې د ازادو، رڼو اوعادلانه ټاکنو د ترسره کېدو لپاره يې د خوست په نظامي شورا کې د امنيتي تدابيرو لپاره پر يوه ګډ امنيتي پلان کار کړی دی.
نوموړي همدارنګه په ټينګار سره وويل، چې د ولسمشرۍ له رياسته دوی ته د صادرو شوو احکامو له مخې به هېڅ دولتي چارواکي ته هم اجازه ورنه کړي، چې د ټاکنو په دې ملي پروسه کې مداخله وکړي او يا درغليو ته په کې زمينه برابره کړي.
نوموړي دغه راز د ملي دفاع له وزير بسم الله خان محمدي څخه غوښتنه وکړه، چې ټولو هغو وړانديزونو ته مثبت ځواب ووايي، چې په دغه ولايت کې يې د امنيتي ارګانونو د اکمال، تجهيز او پياوړتيا لپاره مرکز ته کړي دي.
د خوست د ولايت مقام د عامه اړيکو مسوول بريالي روان پژواک خبري اژانس ته وويل، چې خوست ته د ملي دفاع د وزير د راتګ يواځېنۍ موخه د ټاکنو لپاره د امنيتي ارګانونو له پلانونو څخه ځان خبرول و.
بريالي روان زياته کړه، په دې حساس وخت کې، چې ټاکنې په رانږدې کېدو دي، د ملي دفاع وزير د دغه ولايت امنيتي مسوولين وهڅول، چې د امنيت د ټينګښت لپاره تر خپله وسه هلې ځلې وکړي.
