Add new comment

5 of a family gunned down in Baghlan

 
کندوز-پلخمري (پژواک، ٢ وږى ٩٢): وسله والو کسانو ديوې کورنۍ شپږ غړي او له سولې سره يو ځاى شوى طالب په بغلان ولايت کې وژلي او دوه نور يې ټپيان کړي دي .
د يادې کورنۍ غړي دکندوز ولايت د علي اباد ولسوالۍ اوسېدونکي و  او بغلان ولايت ته ديوه واده په مراسمو کې دګډون لپاره تللي وو .
 دعلي اباد ولسوال محبوب الله سعيدي پژواک خبري اژانس ته وويل، چې وسله والو مخالفينو ددوى موټر تېره ورځ مازديګر مهال د مرکزي بغلان  ولسوالۍ په جرخشک سيمه کې درولى او پنځه تنه يې تر نيولو وروسته په ډزو وژلي دي .
هغه زياته کړه، چې وژل شوي کسان څلور ښځې او يو د قاري امير په نوم سړى دى .
سعيدي زياته کړه :((قاري امير يو له هغو طالبانو څخه و، چې مخکې د سولې له بهير سره يو ځاى او دکورنۍ مشر يې په علي اباد کې د سيمه ييزو پوليسو مشر و .))
 دعلي اباد ولسوال  د سيمه ييزو پوليسو ددغه قوماندان نوم وانه خيست او دغه وژنه يې دسيمه ييز پوليس په کورنۍ پورې اړونده وبلله .
دهغه په خبره،  وسله والو مخالفينو ددغې کورنۍ يو ماشوم او يوه ښځه په لوى لاس د وژلو په نيت تر ډزو لاندې راوستل ، خو دواړه ټپيان وو ، چې د درملنې لپاره دکندوز ولايتي روغتون ته واستول شول .
خو د مرکزي بغلان ولسوالۍ يو اوسېدونکى محمد لايق وايي، چې په دغه پېښه کې پنځه ښځې او يو نارينه  وژل شوي دي .
 هغه پژواک ته وويل:(( دغې کورنۍ  دبغلان پر لور په يوه سراچه موټر کې سفر کاوه ، خو طالبانو پرې پيکا او کلاشنکوفونه را واړول او  ټول يې ووژل .))
دغه ځايي استوګن زياتوي، چې ددوى موټر په ډزو سورى سورى شوى دى .
 محمد لايق زياتوي، چې پوليس وروسته د بريدګرو د نيونې په موخه سيمې ته راغلل اومړي يې ورسره يووړل .
تر اوسه د دغې پېښې مسووليت چا پر غاړه نه دى اخيستى .
د ولسمشرۍ مطبوعاتي دفتر په خپله خبرپاڼه کې، د دې ترڅنګ چې د دغې وژنې عاملين يې طالبان بللي، ويلي چې ولسمشر دغه پېښه په سختو ټکوي غندي.
حامد کرزي د وژل شويو کسانو له کورنيو سره د همدردۍ د ښکارولو ترڅنګ، د دغو کسانو وژل مسلمان وژنه او د افغانستان د خلکو له خوښيو سره ښکاره دښمني ګڼلې ده.
ولسمشر ويلي: "دا چې طالبانو دغه خلک وژلي او د هغوى خوښي يې په غم بدله کړې، دوى بايد پوه شي، چې په دنيا کې به د خلکو له کرکې او په اخرت کې له الهي دردناک عذاب څخه به خلاصون ونه مومي."
د ويلو ده،چې شپږ مياشتې وړاندې ناپېژاندو وسله والو دمرکزي بغلان په اوږدو کې هم يو مسافر وړونکى سراچه موټر په نښه کړ ، چې پايله کې يې دوه ښځې ووژل شوې ، خو يو بل سړى او ماشوم ټپيان وو .
 

CAPTCHA
This question is for testing whether or not you are a human visitor and to prevent automated spam submissions.