چاريکار (پژواک ٢٨ زمرى ٩٢ ) : د کاپيسا د کوهستان ددويمې حصې په ولسوالۍ کې د ماين په يوه چاودنه کې څلور پوليس وژل شوي دي.
ددې ولايت دامنيه قوماندانۍ وياند سمونمل همايون رشيدى د زمري په ٢٨مه، پژواک خبري اژانس ته وويل چې دا پېښه نن سهار په شپږو بجو رامنځته شوې ده.
هغه زياته کړه چې پوليسو د کوهستان ددويمې حصې ولسوالۍ په مربوطاتو کې يو ماين کشف کړى او د انجنيرۍ څلور کسيزه ډله ددې ماين دشنډولو په موخه ساحې ته ورغلي وو.
د نوموړي په وينا، د پوليسو دانجنيرۍ ډله ياد ماين شنډ کړى و، خو د بېرته راتګ پر مهال په لاره کې د سړک د غاړې بل ماين پرې وچاودېد.
رشيدي وايي چې په دې چاودنه کې څلور پوليس ووژل شول او دهغوى پوځي د ماين شنډولو موټر هم له منځه تللى دى.
د امنيه قوماندانۍ وياند وويل چې دپېښې په اړه پلټنې پيل شوې دي.
وسلوالو مخالفينو تر اوسه په دې اړه څه نه دي ويلي.
