جلال اباد (پژواک ١١ وږى ٩٣): د ننګرهار ولايت يو شمېر ديني عالمانو، قومي مشرانو او د مدني ټولنې استازو د ټاکنو پايلو د ژر اعلان غوښتنه وکړه.
د غونډې ګډونوالو چې د ډاکټر اشرف غني احمدزي ملاتړي وو، ګواښ وکړ چې د ټاکنو د پايلو نور ځنډ به ولسونه را وپاروي.
د يادې غوندې ويناوال مولوي شېراکبر وويل چې تر اوسه په حوصله مندۍ د ټاکنو کمېسيون له لوري د پايلو د اعلان په تمه وو خو تر دې وروسته به غلي پاتې نه شي.
هغه وايې: ((شرعي حکومت غواړو، واټونه ته به راووځو او تر هغه به خپلو لاريونونه وکړو چې پايلې اعلان شوې نه وي.))
د خوږياڼو ولسوالۍ قومي مشر معلم ګل محمد لقماني بيا د ټاکنو پر کمېسيون او ولسمشر کرزي غږ وکړ چې نور دې ولسونه نه ځوروي او د ټاکنو پايلې دې ژر اعلان کړي.
هغه وويل که د ټاکنو پايلې ژر اعلان نه شي پراخ مدني خوځښتونه به پيل کړي او که هر څه رامنځ ته شول مسووليت به يې د ټاکنوکمېسيون پر غاړه وي.
لقماني وويل: ((موږ د چوک پر مزدوران باندې لاريون نه کوو او نه چا ته پيسې ورکوو، رايه مو ورکړې او د رايو د دفاع په موخه به لاريونونه وکړو.))
د ننګرهار ولايتي شورا غړي نصرت الله ارسلا پر ټاکنيزو کمېسيونونو، ملګرو ملتونو او پر ولسمشر کرزي غږ وکړ چې د ټاکنو پايلې ونه ځنډوي.
ارسلاوويل: ((ولس به خوځښتونه پيل کړي او که هر څه پېښ شول پړه به يې پر ټاکنيزو کمېسيونونو او حکومت وي.))
د ننګرهار د ولايتي شورا وکيل ذبيح الله زمري وايي، نننۍ غونډه د دوى د مدني حرکتونو پيل دى.
د زمري وويل: ((دا مو د مدني خوځښتونو پيل دى، دا لړۍ به دوام ولري څو زموږ غوښتني ونه منل شي.))
د ولسمشريزو ټاکنو پايلو پر سر شخړو تر مياشتو مياشتو دوام وکړ خو لا تر اوسه هم پايلې نه دې اعلان شوې.
