Kandahar

کندهار (پژواک، ۱۸ غبرګولی ۹۸): په کندهار کې د ټاکنو د خپلواک کمېسیون چارواکي وايي، د ولسمشرۍ ټاکنو اړوند د تقویتي نوم لیکنې لپاره به په کندهار ښار او ټولو ولسوالیو کې ۲۸ مرکزونه پرانیستي وي.
د هېواد د نورو ولایتونو په څېر نن د غبرګولي په ۱۸مه په کندهار کې هم د ولسمشرۍ ټاکنو لپاره د تقویتي نوم لیکنې لړۍ پيل شوه.
په دغه مراسمو کې د کندهار مرستیال والي عبدلحنان منیب، د کندهار د ټاکنو خپلواک کمېسیون مشر هاشم دراني، د ولایتي شورا غړو او نورو چارواکو ګډون کړی وو.

کندهار (پژواک، ١٣ کب ٩٧) : له کندهار ولايت څخه د ولسي جرګې کانديد اسدالله ماشوري  د چسپکي ماين په يوه چاونه کې ووژل شو.
د کندهار د والي وياند عزيز احمد عزيزي د کب په ١٣مه، پژواک خبري اژانس ته وويل، چې دا پېښه نن مازيګر په شاوخوا څلورو بجو د کندهار ښار د څلورمې ناحيې اړونده د فابريکې سراى ته څېرمه رامنځته شوه.
هغه زياته کړه، د ولسي جرګې د کانديد اسدالله ماشوري پر موټر چسپکي ماين نښلول شوى و، چې د چاودنې له امله يې نوموړى وژل شوى دى.
د ده په وينا، پوليسو په دې اړه پلټنې پيل کړې دي.
 ددغې چاودنې مسووليت تر اوسه چا نه دى منلى.