Herat

 
کابل (پژواک ٢٥ وږى ٩٢): په هرات کې د امريکا کونسل پر دغه ډيپلوماتيک مرکز د بريد په ترڅ کې د وژل شوو او ټپيانو له کورنيو سره د خواخوږۍ څرګندولو ترڅنګ وايي، چې د دې سياسي نمانيده ګۍ کارونه بېرته پيل شوي دي.
په هرات کې د امريکا کونسل جيليان برنز په خپله هغه وينا کې، چې پژواک ترلاسه کړې ويلي، چې له دې پېښې د بدو پايلو وېره هم وه، خو د کونسلګرۍ ساتونکو او افغان ځواکونو د ايساف په مرسته ترې مخينوى وکړ.

 
هرات (پژواک، ٢٥ وږى ٩٢): د هرات د ټاکنو خپلواک کمېسیون وايي، چې د ښځو له پراخ ګډون پرته د ټاکنو مشروعیت تر پوښتنې لاندې راتلى شي.
دغه څرګندونې، نن په هرات کې د ټاکنو د خپلواک کمېسيون مشر احمد ضیاء ضیاء، په هغې غونډه کې وکړې ، چې له سلو څخه د زياتو ښځو په ګډون جوړه شوې وه او موخه يې په ټاکنو کې د مېرمنو عامه پوهاوى و.
ده وويل، ټاکنو کې د ګډون لپاره د کارت وېشلو له پیله تراوسه ۷۰زرو تنو ته کارتونه وېشل شوي، چې ۳۸ سلنه یې مېرمنې جوړوي، خو هيله ده چې د ښځو ونډه به ۵۰ سلنې ته لوړه شي.

 
هرات ښار ( پژواک ٢٣ وږى ٩٢ ) : د هرات د شينډ ولسوالۍ ولسوال له يوې چاودنې روغ وتلى دى .
د شينډنډ ولسوالۍ امنيه قوماندان سمونوال غلام غوث مليار د وږي په ٢٣مه، پژواک خبري اژانس ته وويل چې ولسوال عبدالحميد فضلي نن غرمه مهال له هرات ښار څخه د شينډنډ ولسوالۍ په لور روان و، چې دادرسکن ولسوالۍ ،  په مربوطاتو کې د سړک د غاړې ماين چاودنه پرې وشوه.
هغه زياته کړه چې ولسوال او ساتونکي يې له چاودنې روغ وتلي دي، خو موټر يې لږ زيانمن شوى دى.
نوموړي ددې چاودنې پړه وسلوالو طالبانو واچوله ، خو طالبانو تر اوسه په دې اړه څه نه دي ويلي.