Khost د ولايتي شوراګانو ټاکنې

خوست ښار (پژواک، د ليندۍ لومړۍ نېټه ٩٤): د خوست د ولايتي شورا يوه ښځينه غړې، د هغې د زده کړو د اسنادو د نيمګړتيا تر تثبيت وروسته له شورا لرې او پر ځای يې يوه بله کانديده ور وپېژندل شوه.
د دغه ولايت د ټاکنو کمېسيون مشر عبدالرحمن محبت د ليندۍ په لومړۍ نېټه، د دويمې غړې د پېژندنې په مراسمو کې وويل چې د ولايتي شورا دغه غړې حجاڼۍ حکمينه د دوولسم ټولګي د فراغت قانوني اسناد نه لري.
نوموړى وايي چې د دې غړې د زده کړو اسناد د ټاکنو د مرکزي دفتر د يوه ټاکل شوي پلاوي له لوري په دقيق ډول څېړل شوي چې په پايله کې يې جعلي ثابت شوي دي.

خوست ښار (پژواک، ١٥ تله ٩٤): د خوست ولايتي شورا له خلکو غوښتنه کوي چې په دغه ولايت کې د ټينګ شوي امنيت په ساتلو کې له امنيتي ځواکونو سره خپلې همکارۍ ته دوام ورکړي.
د دې شورا يوه غړي جانمير ځاځي پژواک اژانس ته وويل چې په دې وروستيو مياشتو کې خوست د امنيت د ټينګښت له پلوه د افغانستان له با امنه ولايتونو ګڼل کېږي.
هغه يې لاملونه د افغان امنيتي ځواکونو پياوړتيا، اکمال او تجهيز او دغه راز په ياده برخه کې د عامو خلکو همکاري په ګوته کړل.

خوست ښار (پژواک، ١٩ وږى ٩٤): په خوست ښار کې سلګونو خلکو د لاريون په ترڅ کې له دولته وغوښتل چې په برېښنايي تذکرو کې د" اسلام" او"افغان" کلمو د ليکلو په اړه جدي ګام پورته کړي.
په برېښنايي تذکرو کې د يادو کلمو د نه ليکلو پر وړاند د افغانانو د غبرګونو په لړ کې د خوست په دغه لاريون کې د ولايتي شورا او مدني بنسټونو په ګډون نږدې زرو کسانو برخه اخيستې وه.
لاريونوالو په خپلو شعارونو او خبرو کې په برېښنايي تذکرو کې د "اسلام" او"افغان" کلمو نه ليکل، د ځينو کړيو له لوري د افغانستان د قومونو تر منځ د نفاق اچولو ستره دسيسه وبلله.

خوست ښار (پژواک، ٢١ زمرى ٩٤): په خوست کې ديني عالمانو، قومي مشرانو او د مدني ټولنې غړو په هېواد په تېره پلازمېنه کابل کې وروستي ترهګريز بريدونه وغندل او هغه يې د افغانستان د دښمنانو کار وباله.
د ديني عالمانو، قومي مشرانو او د مدني ټولنو دغه ګډه غونډه چې د زمري په يوويشتمه په هېوادپال ځواک ټولنيز بنسټ کې جوړه شوې وه، هېواد کې وروستي ترهګريز بريدونه چې له امله يې لسګونه تنه مړه او په سلګونو نور ټپيان شول وغندل.

خوست ښار ( پژواک، ١٣ زمرى ٩٤ ) : د خوست د ولايتي شورا غړي وايي، هڅه کوي د قانون په تطبيق،دغوره حکومتوالۍ په پياوړتيا، د امنيت په ټينګښت او نورو برخو کې چې د دوی له وس پوره وي له ولايتي ادارې سره همکاري وکړي.
د خوست د ولايت مقام څخه د زمري په ١٣مه، پژواک خبري اژانس ته په يوه رالېږل شوې خبرپاڼه کې راغلي چې يادې څرګندونې له والي حکم خان حبيبي سره د ولايتي شورا په مياشتنۍ غونډه کې د دغې شورا غړو وکړې.
خبرپاڼه کې د شورا د غړو په حواله راغلي، هڅه کوي چې د ولايتي ادارې په همکارۍ ولسي ستونزې دنافذه قوانينو په رڼا کې هوارې کړي.

خوست ښار (پژواک، ٦ زمرى ٩٤): د خوست ديني عالمانو او قومي مشرانو د هېواد په شمالي ولايتونو کې په ناقانونه ډول پر خلکو د وسلو د وېش له امله په دغه هېواد کې د يوه بل بحران پر رامنځته کېدو اندېښنه څرګنده کړه.
دوی د سولې له روانې پروسې د ملاتړ په غونډه کې وويل، ځينې کړۍ غواړي چې د خپلو ګټو په خاطر د افغان حکومت او وسله والو طالبانو تر منځ د روانو خبرو اترو په مخ کې خنډونه جوړ کړي.
ديني عالمانو او قومي مشرانو، چې مدني ټولنو او د ولايتي شورا ځينو غړو يې ملاتړ کاوه، نن په يوه غونډه کې له ولسمشر څخه غوښتل، چې د سولې د ټينګښت لپاره له هرې ممکنې لارې څخه کار واخلي.

ګردېز (پژواک، ١١ چنګاښ ٩٤): د پکتيا سيمه ييز چارواکي وايي چې د خوست_ ګردېز د لويې لارې د رغونې چارې به د روان کال تر پايه بشپړې او ګټې اخيستنې ته به وسپارل شي.
د خوست- ګردېز لويه لاره نږدې ۱۰۵ کيلومتره اوږدوالی لري چې اووه کاله وړاندې يې د رغونې چارې پيل شوې خو د ځينو ستونزو له امله يې څو ځلې چارې په ټپه درېدلې وې.
د پکتيا د فوايد عامې مشر انجنير عبدالله دراني د چنګاښ په ١١مه پژواک خبري اژانس ته وويل چې د دغه سړک ٨٨ کيلومتره رغول شوې، يواځې ١٧ کيلومتره يې پاتې ده.
ياد سړک قير او اساسي رغول کېږي.

خوست ښار ( پژواک، ٣ غبرګولى ٩٤) :د خوست د نشه يي توکو پرضد د مبارزې رييس وايي، چې د دې توکو پرضد په مبارزه کې يې پرمختګ کړی، خو د ولايتي شورا غړي او ځينې نور خلک يې په پراخ ډول د استعمال او قاچاق خبره کوي.
ددې ولايت د نشه يي توکو پرضد د مبارزې رييس ميرناګل تڼيوال د غبرګولي په ٣مه، يوه خبري کنفرانس ته وويل، چې په تېرو ۸ کلونو کې په دې ولايت کې د نشه يي توکو قاچاق، استعمال او توليد د مخنيوي په برخه کې زيات پرمختګ شوی دی.

خوست (پژواک ٣١ غويى ٩٤): د خوست امنيه قوماندان وايي، هڅه کوي چې په دې ولايت کې له نورو امنيتي ارګانونو سره يو ځای د ورانکارو فعاليتونو په مخنيوي او د امنيت په ټينګښت کې ګډ لازم کار ته دوام ورکړي.
د دې ولايت امنيه قوماندان مل پاسوال فيض الله غيرت، دغه څرګندونې په هغې غونډه کې وکړې، چې د خوست د ولايتي شورا له لوري هغه ته د امنيت په برخه کې د ښو کړنو د ترسره کولو په خاطر د ستاينليک د ورکړې لپاره جوړه شوې وه.

خوست ښار (پژواک، ٢٧ غويى ٩٤): د خوست د ولايتي شورا ځينو غړو، يو شمېر مدني فعالانو او ديني عالمانو له ولسمشره وغوښتل چې د دغه ولايت د سالم مديريت لپاره پر کار پوه والي ور ولېږي.
دوی دا غوښتنه د غويي په ٢٧مه په يوه خبري کنفرانس کې وکړه.
د خوست د ولايتي شورا منشي جانمير ځاځي ياد خبري کنفرانس ته په خبرو کې وغوښتل چې د خوست د اوسني حالت د ښه کېدو لپاره دې مرکزي حکومت کوټلي ګامونه واخلي.
هغه دغه راز غوښتنه وکړه، د هغو کمېسيونونو د څېړنو پايله دې اعلان شي چې څه موده مخکې د والي عبدالجبار نعيمي پر ضد د اعتراضونو او د ځانمرګي بريد د څېړلو لپاره خوست ته رالېږل شوي وو.