Herat ټاکنیز خبرونه

هرات ښار ( پژواک ٢٣ وږى ٩٢ ) : د هرات د شينډ ولسوالۍ ولسوال له يوې چاودنې روغ وتلى دى .
د شينډنډ ولسوالۍ امنيه قوماندان سمونوال غلام غوث مليار د وږي په ٢٣مه، پژواک خبري اژانس ته وويل چې ولسوال عبدالحميد فضلي نن غرمه مهال له هرات ښار څخه د شينډنډ ولسوالۍ په لور روان و، چې دادرسکن ولسوالۍ ، په مربوطاتو کې د سړک د غاړې ماين چاودنه پرې وشوه.
هغه زياته کړه چې ولسوال او ساتونکي يې له چاودنې روغ وتلي دي، خو موټر يې لږ زيانمن شوى دى.
نوموړي ددې چاودنې پړه وسلوالو طالبانو واچوله ، خو طالبانو تر اوسه په دې اړه څه نه دي ويلي.

هرات( پژواک، ١٢ وږى ٩٢): د لوېديځ زون درې ولايتونو هرات، بادغيس او غور د مدني ټولنو استازو له لاسوهنې پرته او شفافو ټاکنو د تر سره کېدو غوښتنه وکړه.
په هرات کې دځوانانو ملي غورځنګ په نوم د ټولنې رييس خليل پارسا، چې د غونډې سمبالونکی هم و ، د ټاکنو پر وړاندې نا مسووله وسله وال تر ټولو ستر خنډ وبلل.
هغه له امنيتي چارواکو وغوښتل،چې په هره ممکنه وسيله دې د ټاکنو د خونديتوب لپاره چټک ګامونه پورته کړي.
د غور د مدني ټولنو په استازيتوب حسن حکيمي وويل ،په غور کې لا هم غير مسول وسله وال په زور کې دي او خلک يې په يو نه يو ډول برمته کړي دي.

هرات ( پژواک ٥ وږى ٩٢) : د هرات څارنوالۍ چارواکي وايي،چې د هرات د ملکي هوايي ډګر مشر يې د اداري فساد او اختلاس په تور نيولى دى.
د هرات د ښاري څارنوالۍ مشر څارنمل ګل احمد رامش د وږي په ٥مه پژواک اژانس ته وويل، چې محمد عظم عظيمي يې د هوايي ډګر د مامورينو د شکايت په اساس نيولى دى.
رامش زياته کړه،نوموړي د هوايي ډاګر د کارکوونکو د اضافه کارۍ ٤٠ زره افغانۍ خپل جيب ته اچولې وې.
د څارنوال په وينا،دغه پيسې د ٢٧ کارکوونکو د اضافه کارۍ حق و.
هغه وايي، د هوايي ډګر مشر منلې، چې دغه پيسې يې د کارکوونکو د اجازې له مخې اخيستې دي.

هرات ښار (پژواک ٤ وږى ٩٢): د هرات په ګلران ولسوالۍ کې د ملي پيوستون شپږ کار کوونکي تښتول شوي دي.
د هرات د امنيه قوماندانۍ وياند سمونوال عبدالرووف احمدي د وږي په ٤مه پژواک خبري اژانس ته وويل، چې په تښتول شوو کې څلور انجنيران او دوه نور موټر چلوونکي دي.
هغه زياته کړه، چې دغه کسان تېر مازديګر له ګلران ولسوالۍ څخه د بېرته راستنېدو پر مهال د ولسوالۍ مرکز ته نږدې څو وسله والو موټرسايکل سپرو تښتولي دي.
احمدي وايي، د تښتول شوو د ژغورلو په موخه يې هڅې پيل کړي او وايي چې تر اوسه يې د تښتولو انګېزه نه ده معلومه شوې.

هرات ( پژواک، ٢ وږى ٩٢) : د هرات امنيتي چارواکي وايي، چې ايران ته قاچاق کېدونکي ٣٣٠ کيلوګرمه نشه يي توکي يې نيولي دي.
د هرات دامنيه قوماندانۍ وياند سمونوال عبدالرووف احمدي د وږي په ٢مه پژواک ته وويل،چې دغه نشه يي توکي يې د غوريان په ولسوالۍ کې نيولي دي.
هغه زياتوي،چې دغه نشه يي توکي ايران ته د قاچاق په نيت د غوريان ولسوالۍ په يوه لرې سيمه کې پرون ماښام د عملياتو پر مهال ترلاسه شول.
د غوريان امنيه قوماندان سمونوال غلام سخي حسيني وايي،چې ترياک په غوريان ولسوالۍ کې د ايران سرحد ته نږدې يوه کلي کې د قاچاق په نيت پټ کړای شوی وو.

هرات (پژواک ٢٦ زمرى ٩٢): چارواکي وايي، چې وسله والو تېره شپه په کرخ ولسوالۍ کې د يوه ودانيز شرکت ٩ کارګر وژلي دي.
د هرات د امنيه قوماندانۍ وياند سمونوال عبدالروف احمدي د زمري په ٢٦مه پژواک اژانس ته وويل، چې د وسله والو له خوا تېره شپه لومړى د پوليسو پر يوې امنيتي پوستې بريد ترسره شو.
دى وايي، چې د کجه په سيمه کې د دې پوستې يو پوليس ووژل شو او يو بل ټپي شو، خو بريد کوونکو ته درنه مرګ ژوبله واوښته.
د سرچينې په وينا، چې وروسته طالبانو د خپلې درنې مرګ ژوبلې په بدل کې د سړک جوړونې پر کارګرو بريد وکړ او ٩ تنه يې ووژل.

هرات ښار ( پژواک ٥ زمرى ٩٢ ) : د هرات – کابل د لويې لارې موټر چلوونکو او د ټرانسپورتي شرکتونو استازو د هرات ولايت مقام مخې ته د نا امنيو په غبرګون کې احتجاج او لاريون وکړ.
دغه لاريون نن د زمري په ٥مه، تر غرمې په انجيل ولسوالۍ کې پيل شوى و، تر غرمې وروسته د هرات ښار ته راورسېدل او د ولايت مخې ته يې شعارونه ورکړل.
دوى له ځانه سره هغه سوځو ل شوي موټر هم په ټېلرو کې بار راوړي وو، چې د وسلوالو مخالفينو په دې وروستيو کې د بريدونو پر مهال سوځول شوي وو.

هرات (پژواک، ٢ زمرى ٩٢): د هرات چارواکي مني، چي د شينډنډ ولسوالۍ ډېرى مامورين دندو ته نه ځي او خلک خپلې اداري ستونزې ۱۴۰ کيلومتره لرې په هرات ښار کې حل کوي.
د هرات والي فضل الله وحيدي د هغې ولسوالۍ د يو شمېر استوګنو له شکايت وروسته پژواک خبري اژانس ته دا ومنله، چې دندو ته د مامورينو نه حاضرېدل په شينډنډ کې د بې ثباتۍ او پر امنيت د نه باور عامل شوی دی.
والي د زمري په ٢مه پژواک ته وويل، شينډنډ ته د خپل سفر پر مهال ورته څرګنده شوه، چې په دې ولسوالۍ کې حکومتوالي کمزورې او خلکو ته اسانتياوې نشته.

هرات (پژواک ٢٦ چنګاښ ٩٢): چارواکي وايي، د ملي امنيت شورا د سلاکار ډاکټر رنګين دادفر سپنتا ورور د هرات په کرخ ولسوالۍ کې ووژل شو .
د هرات د امنيه قوماندانۍ وياند سمونوال عبدالرووف احمدي د چنګاښ په ٢٦مه پژواک اژانس ته وويل، چې د سپنتا ورور څارنوال محمدولي نن سهار د يوه ناپېژانده تن له لوري وژل شوى دى.
احمدي زياتوي، څارنوال محمدولي د کرخ ولسوالۍ په بازار کې له حمام څخه د راوتو پر مهال پر ډزو وژل شوى دى.
احمدي وايي، چې تر اوسه يې د پېښې په تړاو څوک نه دي نيولي، خو پوليسو په سيمه کې پلټنې پيل کړې دي.

هرات (پژواک ٢٣چنګاښ ٩٢): په لوېديځ زون کې په تېرو درېيو مياشتو کې د پسرلنيو عملياتو په پايله کې د سلو وسله والو طالبانو د وژلو او ١٣٠ نورو د ټپي کېدو ادعا وشوه.
په لوېديځ زون کې د ٢٠٧ ظفر قول اردو قوماندان جنرال تاج محمد جاهد، نن وويل ، چې د روان کال د پسرلي موسم له پيله په هرات، غور، بادغيس او فراه ولايتونو کې يې ٤١ عملياته کړي، چې په ترڅ کې يې وسله والو طالبانو ته ياده مرګ ژوبلې اوښتې ده.
ده زياته کړه، په دې عملياتو کې افغان ځواکونو ته هم مرګ ژوبله اوښتې، خو کره شمېره يې په ډاګه نه کړه او وايي، چې د طالبانو په پرتله يې شمېره لږه ده.