کابل (پژواک، ۲۳غبرګولی ۹۸): د ټاکنو خپلواک کمېسیون وايي، د رایه ورکوونکو تقویتي نوم لیکنې توکو لېږد کې ځنډ د دې لامل شوی څو په دې بهیر کې د خلکو ګډون پیکه شي، خو تمه ده چې په راتلونکو ورځو کې د خلکو ګډون زیات شي.
د رایه ورکونکو تقویتي نوم لیکنې بهیر د غبرګولي په ۱۸مه ټول هېواد کې پیل شو او ټاکل شوې چې په دې پړاو کې به د اتلس کلنۍ عمر ته رسېدلي کسان، هېواد ته نوي راستانه شوي هېوادوال چې مخکې یې نوم لیکنه نه ده کړې، يا دا چې نوم یې د رایه ورکوونکو په نوملړ که سم نه دی ثبت شوی او یا یې تذکره ورکه کړې وي، نوم لیکنه وکړي.
د رایه ورکوونکو دې تقویتي پړاو کې د هېواد په کچه ۴۵۸ او غزني ولایت کې ۲۴۲ مرکزونه په پام کې نیول شوي دي او ټاکل شوې چې دا بهیر د چنګاښ تر اتمې نېټې دوام وکړي.
د ټاکنو خپلواک کمېسیون د دارالانشاء مشر حبیب الرحمن ننګ چې نن یې د ((ټاکنو ملي غونډه)) کې پر ټاکنو د څار بنسټونو استازو، سیاسي ګوندونو او مدني ټولنې استازو په موجوديت کې خبرې کولې، وویل: ((پلان مو درلود چې د رایه ورکوونکو تقویتي نوم لیکنې بهیر په ټول هېواد کې د غبرګولي په ۱۸مه پیل کړو، خو د تخنیکي ستونزو له امله په دې کار بریالي نه شو.))
نوموړي زیاته کړه چې پوهنې وزارت په ښوونځيو کې د یوه ځانګړي محل له ورکړې اوږه خالي کړه او دغه راز امنیتي ځواکونو په ټاکلې نېټه د توکو لېږد کې له کمېسیون سره همکاري و نه کړه چې دا چاره لامل شوه څو په زیات شمېر ولسوالیو او ولایتونو کې د تقویتي نوم لیکنې بهیر وځنډېږي.
هغه په ځینو ولسوالیو کې د ناامنیو له امله د مرکزونو د نه فعالېدو په اړه جزئیات ور نه کړل، خو ویې ویل چې په بالامرغاب ولسوالۍ کې د نوم لیکنې ټول توکي سوځول شوي دي او د زابل دای چوپان او ننګرهار شېرزاد ولسوالیو ته د نوم لیکنې توکو نه رسېدو او د تخار په خواجه غار ولسوالۍ کې د جګړو له امله  تراوسه د نوم لیکنې بهیر نه دی پیل شوی.
د نوموړي په وینا، د رایه ورکوونکو تقویتي نوم لیکنې له پیل راهيسې، نږدې ۱۵ زرو کسانو نوم لیکنه کړې ده چې په دې کې ۹۳۵۸ نارینه، ۴۵۰۰ ښځې او ۱۱۳ نور یې کوچیان دي.
د ټاکنو خپلواک کمېسیون د دارالانشاء مشر وویل چې ګوندونه، د مدني ټولنو بنسټونه او رسنۍ مکلفې دي څو د خلکو پوهاوي په برخه کې له دې کمېسیون سره همکاري وکړي.
د ټاکنو خپلواک کمېسیون مشرې حوا علم نورستاني د رڼو او عادلانه ټاکنو په ترسره کېدو د ټینګار کولو ترڅنګ له سیاسي ګوندونو، د مدني ټولنې بنسټونو، پر ټاکنو د څار بنسټونو او رسنیو غوښتنه وکړه څو د عامه پوهاوي لوړتیا او د تقویتي نوم لیکنې بهیر بریا په برخه کې له کمېسیون سره همکاري وکړي.
هغې وویل، د ټاکنو خپلواک کمېسیون یوه کمېټه جوړه کړې څو هغه کسان چې په کمېسیون کې په فساد اخته دي او له خپلو واکونو ناوړه ګټه اخلي، وپېژنې او د قانون منګولو ته یې وسپاري.
د ټاکنیزو شکایتونو کمېسیون مشرې زهرې بیان شینواري وویل چې د رایه ورکوونکو تقویتي نوم لیکنې په تړاو د شکایتونو بهیر د غبرګولي په ۲۱مه پیل شو او تر اوسه په دې کمېسیون کې ۴۱ شکایتونه ثبت شوي دي.
په ورته مهال پر ټاکنو د څار بنسټونه او سیاسي ګوندونه د ټاکنو خپلواک کمېسیون پروګرامونو پر ټکني والي نیوکه وکړه او د ټاکنو له کمېسیون څخه یې غوښتنه وکړه څو د رایه ورکوونکو نوملړ سمون، امنیتي مسایلو، بودیجې او تخنیکي برخې ته جدې پاملرنه وکړي.
د افغانستان د رڼو ټاکنو بنسټ (ټیفا) رییس محمد نعیم ایوب زاده چې په دې غونډه کې موجود و، وویل چې د ټاکنو خپلواک کمېسیون باید د ټاکنو له ترسره کولو وړاندې د رایه ورکوونکو بشپړ نوملړ له ځان سره ولري او د تېرو ټاکنو په څېر له خیالي شمېرو وړاندې کولو څخه ډډه وکړي.
هغه زیاته کړه، په تېرو ټاکنو کې د نوملړ له مخې د رایه ورکوونکو شمېر له ۹ – ۱۰ میلیونه کسان وو، د ټاکنو په ورځ نږدې پنځه میلیونه رایه ورکوونکو ګډون وکړ او کمېسیون باید د لګښت راکمولو او له درغلیو د مخنیوي لپاره د رایه ورکوونکو کره نوملړ ترتیب کړي.
د حزب اسلامي استازي عبدالستار خواصي د رایه ورکوونکو تقویتي نوملړ نیمګړی وباله او ویې ویل چې باید د درغلیو او سرغړونو مخنیوي لپاره نوم لیکنه د بایومتریک سیستم له مخې ترسره شي.
د یادونې ده چې د ټاکنو خپلواک کمېسیون له لوري د اعلان شوې مهالوېش له مخې، د ولسمشرۍ ټاکنې د روان کال تلې په ۶مه ترسره شي.  

 

Add new comment

CAPTCHA
This question is for testing whether or not you are a human visitor and to prevent automated spam submissions.

دورستیو خبرونو، فیچرونو ، مرکو ، ویډیو او انځورونو ته دلاسرسي په موخه دپژواک خبري آژانس مبایل اپلکیشن ډانلوډ کړئ.