Baghlan

 
کابل (پژواک ٢ ورى ٩٣): د ولسمشرۍ کانديد عبدالله عبدالله له خپلو دوو مرستيالانو سره يو ځاى د ټاکنيزو مبارزو په ترڅ کې، د بغلان اوسېدونکو ته په يوه لويه غونډه کې خپل راتلونکي پروګرامونه واورول.
په دغې غونډه کې، چې د دغه ولايت په مرکز د پلخمري ښار په لوبغالي کې تر سره شوه، د بغلان ولايت زرګونو کسانو ګډون کړى وو.
عبدالله عبدالله په ياده غونډه کې، چې دواړو مرستيالانو محمدخان او محمد محقق هم په کې ګډون درلود، د بغلان ولايت د بيارغونې پر کارونو نيوکه وکړه او ويې ويل، د برياليتوب پر مهال به دغې برخې ته ډېره پاملرنه وکړي.

 
پلخمري (پژواک ١٩ سلواغه ٩٢): په بغلان ولايت کې د تېلو د يوه پمپ څښتن وروسته له هغه ووهل شو، چې د ياد پمپ د ودانۍ پر دېوالونو د وسله والو له خوا د ولسمشرۍ د يوه کانديد له تصويرونو سره يې مخالفت وکړ.
د تېلو د دغه پمپ مالک عبدلشکور ادعا  کوي، چې تېر مازديګر څو کسه په يوه سراچه موټر کې راغلل، غوښتل يې چې د ولسمشرۍ رياست د کانديد عبدالرب رسول سياف تصويرونه پر دېوالونو ولګوي، خو ده ورسره مخالفت وکړ.
هغه پژواک خبري اژانس ته وويل، چې دغو کسانو وروسته چا ته ټيلېفون وکړ، د پوليسو په جامه کې څو وسله وال په رينجر موټر کې راغلل او دى يې وواهه.

 
پلخمري (پژواک ٧ لړم ٩٢): د بغلان ولايت د کرکر د ډبرو سکرو کان د يوه تونل په بيارغونې سره به د سکرو د استخراج کچه هره ورځ سلو ټنو ته لوړه شي.
دغه تونل، چې د (پي يک) په نوم ياديږي، د افغان-کول په نوم د يوه افغاني شرکت له لوري، چې د يوه تړون له مخې د بغلان ولايت د کرکر، اهن درې او دودکش د ډبرو سکرو کانونه په واک کې لري، په معياري ډول له سره رغول کېږي.
د کرکر کان امر ډيپلوم انجينر عبداللطيف وهابزي پژواک خبري اژانس ته وويل، چې دغه تونل په تېرو وختونو کې د ډبرو سکرو تر ټولو فعال کان و، خو پر افغانستان د شوروي د يرغل تر جګړو وروسته له کاره ولوېد.