چاريکار ( پژواک ١٠ زمرى ٩٢ ) : د پروان ولايت د پوهنې چارواکي وايي ، چې د پوهنې په برخه کې د پام وړ پرمختګونه شوي، خو د مسلکي ښوونکو د نشتوالي ستونزه د ښوونيز بهير د نور پرمختګ پر وړاندې ستر خنډ بولي.
د پروان د پوهنې رييس زلمى شهيد وايي، چې دا ولايت ټول ٤١٠ ښوونځي لري، چې ١٥٩ يې لېسې ، ١٢٦ يې منځني ښوونځي او ١٢٥ يې لومړني ښوونځي دي . په دې ښوونځيو کې ٨١٢ ښځينه او ٤٨٦٧ نارينه ښوونکي په تدريس بوخت دي .
هغه پژواک خبري اژانس ته وويل، چې په دې ښوونځيوکې ١٢٨٠٧٠ هلکان او ٧٧١٦٥ نجونې په زده کړو بوختې دي.
