ګردېز (پژواک ١٧ چنګاښ ٩٤): د پکتيا د ولايتي شورا غړي وايي، د دې ولايت په څمکنيو ولسوالۍ کې په روانه جګړه کې پاکستاني ځواکونه ګډون لري.
د يادې ولسوالۍ په لوړي سيمه کې له شاوخوا شلو ورځو راهيسې د وسله والو طالبانو او افغان امنيتي ځواکونو ترمنځ جګړه روانه ده، چې دواړه خواوې يو بل ته د مرګ ژوبلې اړولو ادعاوې کوي.
د پکتيا د ولايتې شورا منشي محمد الرحمن قادري، نن په يوه مطبوعاتي کنفرانس کې وويل، چې د څمکنيو ولسوالۍ په جګړه کې له وسله والو سره پاکستاني پوځيان او امريکايي ځواکونه د هوا له لارې د وسلو او خوراکي توکو مرسته کوي.
د دې شورا غړو له مرکزي حکومته غوښتنه وکړه، چې افغان ځواکونو ته دې د وسله والو پر وړاندې د جګړې امر، هوايي مرسته اوهمداډول دې د پاکستانيو پوځيانو او امريکايي ځواکونو د وسلو د وېش مخنيوى وکړي.
د هغه په خبره، د څمکنيو ولسوالۍ د لوړي سيمې ته ګڼ شمېر پاکستاني او افغان طالبان راغلي دي او په وينا يې په دې جګړه کې پاکستاني پوځيان هم د وسله والو په ليکو کې يو ځاى له افغان ځواکونو سره جنګېږي.
د يادې شورا مرستيال حفيظ لله مبازر وويل، که افغان حکومت د سرحدونو امنيت نه شي ساتلى، نو دوى دې ته حاضر دي چې د ولسونو پر مټ يې مخنيوى وکړي.
نوموړي وويل، د نورو ولايتونو امنيتي ستونزو ته جدي پاملرنه کېږي، خو د پکتيا ولايت پر امنيتي ستونزو هېڅوک هم ځان نه خبروي.
بل خوا د پکتيا امنيه قومندان پاسوال زلمى اورياخېل وايي، چې دوى ته داسې شواهد، چې ګواکې له وسله والو طالبانو سره د هوا له لارې د وسلو مرسته کېږي، په لاس نه دي ورغلي.
نوموړي زياته کړه، تر اوسه پورې امنيتي کسانو په جګړه کې د پاکستاني پوځيانو د شتون او مرستې په اړه دوى ته څه نه دي ويلي.
د هغه په وينا، دوى به د پاکستاني پوځيانو د مرستې په اړه پلټنه وکړي.
دا په داسې حال کې ده، چې په دې وروستيو کې د هېواد په بېلابېلو سيمو کې امنيتي وضعيت خراب شوى او خلک يې له ګڼو اندېښنو سره مخ کړي دي.