سرغړونې

سرپل (پژواک، ۲۷ سلواغه ۹۸): د ولسمشرۍ ټاکنو د رایو د تفتیش او بیا شمېرنې بهیر د ټاکنیزو شکایتونو د استازو نه شتون له امله تر اوسه نه دی پیل شوی او په سرپل ولایت کې هم د رایو د بیاشمېرنې بهیر درېدلی دی.
 ټاکل شوې وه د ١٣٧زره رايو د قضيې چې له سلو لس سلنه او د ١٠٢زره رايو د قضيې چې له سلو پنځلس سلنه کيږي او په اړه يې شکايتونه ثبت شوي، شمېرنه يې نن پيل شي.  
 خو د ټاکنو خپلواک کمېسیون کمېشنر عصمت الله مل نن غرمه مهال وویل چې تر اوسه د دغه بهیر د څار لپاره د ټاکنیزو شکایتونو ناظرین نه دي حاضر شوي، چې کله حاضر شي، یاد بهیر پیلېږي.

کابل(پژواک، ۷ سلواغه ۹۸): د ټاکنیزو شکایتونو کمېسیون وايي چې د ځینو ولایتونو د استینافي اعتراضونو دوسیې د وروستۍ پرېکړې لپاره د دغه کمېسیون کمېشنرانو ته سپارل شوې دي.
د ټاکنیزو شکایتونو کمېسیون مرستیال ویاند محمد رضا فیاض نن پژواک خبري اژانس ته وویل چې د ځينو استینافي اعتراضونو ارزونه او دسته بندي پای ته رسېدلې ده.
هغه زیاته کړه، که پر استینافي اعتراضونو همدغه ډول کار روان وي په ټاکلي وخت به یې چارې پای ته ورسېږي.
نوموړي وویل: ((استینافي اعتراضونه لومړى صنف بندي کېږي، ورپسې یې تحلیل او ارزونه پیلېږي او همدا اوس ځینې دوسیې د کمېشنرانو وروستۍ پرېکړې ته انتظار دي.))

کابل (پژواک، د سلواغې لومړۍ نېټه ۹۸): د ټاکنیزو شکایتونو کمېسیون د نږدې ۶۳۰۰ اعتراضونو د ثبت خبر وکړ او وایي چې دا بهیر پای ته رسېدلی او استینافي شکایتونو ته په رسمي توګه رسېدنه پیل شوې ده.
د ټاکنیزو شکایتونو خپلواک کمېسیون مشرې زهرې بیان شینوارې چې نن یې په کابل کې خبري ناستې ته خبرې کولې، وویل چې دا شکایتونه په ۲۹ ولایتونو کې ثبت شوي دي.

کابل (پژواک، ۱۴ مرغومي ۹۸): د ټاکنیزو شکایتونو کمېسیون وایي چې د ولایتي دفترونو د پرېکړې له مخې، د ۱۰۹ محلونو رایې باطلې، د ټاکنو کمېسیون ۷۱ کارکوونکي له دندو ګوښه شوي او له ۵۳۰۰ څخه د ډېرو محلونو رایې تفتیش او بیا شمېرنې ته تللې دي.
د ټاکنیزو شکایتونو کمېسیون رییسې زهرې بیان شینوارې نن په کابل کې یوې خبري ناستې ته وویل چې د ولسمشرۍ ټاکنو د لومړنیو پایلو د اعلان اړوند شکایتونو ته د رسېدنې بهیر  پای ته رسېدلی، او کمېسیون د استینافي شکایتونو د ترلاسي په پړاو کې دي.
هغې دې ته په اشاره چې تر اوسه ۷۶۹ استینافي اعتراضونه ثبت شوي دي، وایي چې کېدای شي دغه امار بدلو ومومي.