Parwan

 
چاريکار( پژواک ٢١ زمرى ٩٢):  د پروان په سياه ګرد ولسوالۍ کې د تېرې شپې  سېلابونو له امله يو تن مړ او بل  لادرکه دى او خلکو ته درانه مالي زيانونه اوښتي دي .
د سياه ګرد ولسوال محمد سعيد صديقي پژواک خبري اژانس ته وويل،چې تېره شپه د سختو بارانونو له امله د  يادې ولسوالۍ په فندقستان ، خشکي ، قل خول او سنجل سيمو کې سېلابونه راووتل.
د ده په وينا، سېلاب د فندقستان په سردرې سيمه کې دوه تنه ځوانان وړي ، چې  يو يې تر اوسه ( له غرمې وروسته درې نيمې بجې ) لادرکه دى او بل يې چې ١٩ کاله عمر لري، مړ پيدا شوى دى .   

 
چاريکار( پژواک، ٩ زمرى ٩٢ ) : د پروان په مرکز چاريکارو کې يو تن د ماين په چاودنه کې ووژل شو،خو  ددې ولايت د کوه صافي ولسوال بيا د ماين له چاودنې روغ ووت .
د پروان د امنيه قوماندانۍ د جنايي جرمونو پر وړاندې د مبارزې مدير سمونوال محمدنارام پژواک خبري اژانس ته وويل، چې نن سهار شاوخوا ٤ بجې د چاريکارو د زاړه ښار په ملتاني سيمه کې يو تن د ماين چاودنې وواژه .
ده وويل ، د نوراقا په نوم دغه تن ، چې د سيمې عادي اوسېدونکى و، د سهار لمانځه د ادا کولو لپاره جومات ته روان و ، چې په کوڅه کې د ځاى پر ځاى کړل شوي ماين چاودنې وواژه .

 
کابل (پژواک،٥ زمرى ٩٢): په کابل کې د نصرت الله په نوم يو خبريال ادعا کوي چې تېره شپه نوموړى د پروان والي لخواډبول شوى دى .
دغه خبريال وايي، تېره شپه هغه مهال چې غوښتل د کابل د نوي ښار په يو رسټورانټ کې له يو ملګرى سره وويني،  د پروان له والي بصير سالنګي سره مخامخ شوى، والي ورته ناوړې کليمې کارولې  ، خو کله يې چې والي ته د خپلو خبرو د ځواب هڅه وکړه نو د والي لخوا پر بوتلونو،شيشو او سوکانو ووهل شو.
د اقبال په وينا، د پروان والي هغه مهال له خپل سلاکاراو دوو نورو کسانو سره په رسټورانټ کې و، او د ده له وهلو او ډبولو وروسته له سيمې وتښتېدل.