Paktika

ښرنه ( پژواک، ٥ مرغومى ٩٤) : تر اوږده ځنډ وروسته د پکتيکا د و لايتي شورا ټاکنې چې د خپلمنځي اختلاف  له امله ځنډېدلې وې، ترسره شوې.
د ولايتي شورا د اداري پلاوي ټاکنې د مرغومي په ٥مه، په دې ولايت کې د ټولټاکنو د خپلواک کمېسيون د ولايتي چارواکو او نورو تر نظارت لاندې ترسره شوې.
ددې ټاکنو په پايله کې بختيار ګل همت ځدراڼ د ولايتي شورا د مشر، نعمت الله بابري د مرستيال او حنيفه کټوازۍ د منشي په توګه وټاکل شول.
د ولايتي شورا پخواني مشر افسر خان سليمان خېل وويل چې تر خپله وسه او توانه به نويو مشرانو سره اوږه په اوږه کار وکړي.

ښرنه(پژواک،٣لړم٩٤): د پکتيکا يو شمېر اوسېدونکي د دې ولايت د ولايتي شورا پر غړو نيوکه کوي چې په خپلمنځي اختلافاتو بوخت دي او چارو کې  يې همغږي شتون نه لري.
د پکتيکا د مرکز ښرنې اوسېدونکي جندالله پژواک خبري اژانس ته وويل چې له تېرو څو مياشتو راهيسې د ولايتي شورا د غړو ترمنځ اختلافات را پيدا شوي او په چارو کې يې همغږي شتون نه لري.
هغه زياته کړه : (( د رياست د څوکۍ پر سر د ولايتي شورا د غړيو ترمنځ اختلافات پيدا شوي نو ځکه ډيرى وکيلان په خپلو کورونو کې ناست دي ، يا هم په خپلو شخصي کارونو بوخت دي او خپلو دندو ته هم نه حاضريږي.)) 

ښرنه (پژواک،٤ تله ٩٤): د پکتيکا د جلغوزو ځيني سوداګر وايي، د بازار د نشتوالى له امله هر کال په جلغوزو کې ميليونونه افغانۍ تاوان کوي او د افغانستان دغه مېوه د پاکستان په نوم پر نورو هېوادونو پلورل کېږي.
دغه سوداګر وايي چې د بازار د نه شتون له امله هر کال خپل جلغوزي په ټيټه بيه او په قسطونو پر پاکستاني سوداګرو پلوري او هغوى بيا دغه جلغوزي د پاکستان په نوم پر نورو هېوادونو پلوري.
د اړوندې موضوع په اړه يوه سوداګر معلم حمدالله پژواک خبري اژانس ته وويل چې هر کال د جلغوزو سوداګر د ملي او نړيوالو بازارونو د نه شتون له امله ميليونونه افغانۍ تاوان کوي.