Takhar ټاکنیز خبرونه

تالقان(پژواک،٢٠تله٩٤): د تخار نوى والي وايي چې له اداري فساد، ترهګرۍ او قومي تعصباتو سره مبارزه يې له کاري لومړيتوبونو څخه ده.
محمد ياسين ضيا د تلې په ٢٠مه د تخار ولايت د نوي والي په توګه معرفي شو.
په همدې اړه جوړې شوې غونډې ته محمد ياسين ضيا وويل چې د سیمې استخباراتو او د هغو کسانو په اړه چې د دې هیواد مشران وژني، پوره معلومات لري.
ضیا وویل چې د هر هغو پدیدو پر وړاندې چې دغه سیمه يې نا امنه کړې او ولس ته يې ستونزې جوړ کړي جدي مبارزه کوي.

 
تالقان (پژواک،٣٠ غبرګولى٩٣): د تخار ولايت د ټاکنو د شکایتونوکمېسیون یوه کمشنر برنا صالحي له خپلې دندې استعفا وکړه.
صالحي دغبرګولي په ٣٠ د يوې خبرې غونډې پر مهال د ټاکنو خپلواک کمېسیون تورن کړ،چې د مشخص کانديد په ګټه یې درغلۍ کړې دي.
هغه وویل:((له خپلې دندې مې په رسمي توګه استعفا ورکړه، غواړم هغې ډلې سره یو ځای شم ،چې د حق او ډیموکراسۍ  لپاره مبارزه کوي.))
 هغه وايي، په تخار کې د درغلیو په اړه ډېر اسناد لري، که اړتیا وي  رسنیو او خلکو ته به یې وړاندې کړي؛څو قضاوت پرې وکړي.

 
تالقان (پژواک ٨ غبرګولى ٩٣): د تخار د ولايتي شورا په لسګونو هغه نوماندان چې د پايلو په لومړي لېست کې نه دي راغلي، لومړنۍ پايلې نه مني او د ټولو رايو د بيا شمېرلو غوښتنه کوي.
ولايتي شورا ته يو نوماند حاجي محمد حسين حسيني چې په لومړي لېست کې يې نوم نه دی راغلی، د ټاکنو کمسېون په درغلـۍ تورنوي او زياتوي، که رايې سمې وشمېرل شي، په لومړني لېست کې به ډېر بدلون راشي.
هغه پژواک اژانس ته وويل چې د څارونکو د راپورونو له مخې يې پلويانو ۵ زره رايې ورکړې وې؛ خو په وينايې چې د ټاکنو کمېسيون په لېست کې يې ٢٧١٠رايې ثبت شوې دي.

 
تالقان ( پژواک، ٢٣ ورى ٩٣ ) : د تخار د ټاکنيزو شکايتونو کمېسيون ددې ولايت د ولايتي شورا يوه  کانديده د  ۲۱۰ زره افغانيو د جريمې ترڅنګه عدالي او قضايي ارګانونو ته هم ور  پېژندلې ده.
د تخار د ټاکنيزو شکايتونو کمېسيون رييس  برنا صالحي د وري په ٢٣مه، پژواک خبري اژانس ته وويل ، چې  د ولايتي شورا  کانديدې لطيفې سعيدي د ټاکنو په ورځ کمپاېن کړى و .
د هغه په وينا، دغې  کانديدې يو شمېر مېرمنې هغې ته د رايه ورکولو په موخه ګواښلي او يو خبريال يې هم په مرګ ګواښلی دى.
صالحي وايي، چې د تالقانو ښار اړونده چشمه شېر کې د ټاکنيزې سيمې په ښځينه برخه کې د هغې رايې هم لغوه شوې دي.