Kapisa ټاکنیز خبرونه

محمودراقي (پژواک، ٢٦ مرغومى ٩٤): ولسمشر له يوه لوړپوړي دولتي پلاوي سره نن له غرمې مخکې محمودراقي ته رسېدلی او په يوه لويه غونډه کې د کاپيسا خلکو ورته خپلې ستونزې وړاندې کړې.
له ولسمشر سره په دغه سفر کې د کابيني يو شمېر غړي او امنيتي چارواکي هم ملګري دي.
په یاده غونډه کې د کاپیسا ولايت چارواکو، قومي مشرانو او د خلکو استازو هم برخه اخیستې ده.
اوس مهال د دغه ولايت خلک، قومي مشران او دولتي چارواکي ولسمشر ته خپلې ستونزې بيانوي.

محمودراقي (پژواک، ٢٧ زمرى ٩٤): په کاپيسا ولايت کې د لومړي ځل لپاره د سوداګرۍ او صنايعو خونه پرانيستل شوه او په فعالېدو سره به يې د سوداګرو ډېرې ستونزې هوارې شي.
د دغه دفتر او ودانۍ د پرانيستې په مراسمو کې د سوداګرۍ خونې مرستيال خان جان الکوزي، د کاپيسا والي سيد خالد، د ولايتي شورا غړو او ځايي چارواکو برخه اخيستې وه.
د کاپيسا د صنايعو او سوداګرۍ خونې رييس حاجي ظاهر حکيمزاده پژواک خبري اژانس ته وويل چې په دغه ولايت کې د سوداګرۍ خونې د نشتوالي له امله ځايي سوداګر له ستونزو سره مخامخ وي.

محمودراقي (پژواک، ١١ چنګاښ ٩٤): چارواکي وايي چې د کاپيسا په اول کوهستان ولسوالۍ کې د دوولسو ميليونه ډالرو په لګښت د سړک جوړونې د درېيو پروژو چارې پيل شوې.
د لومړي کوهستان ولسوال عبدالفتاح شفيق د چنګاښ په ١١مه پژواک خبري اژانس ته وويل چې د دې پروژې له مخې له دويم کوهستان، اول کوهستان او د کوهبند ولسواليو تر منځ نږدې سل کيلومتره سړک جوړېږي.
د هغه په وينا، چې د دغه سړک له جوړېدو سره يادې ولسوالۍ سره تړل کېږي.
ولسوال زياته کړه چې د اول کوهستان د بازار ترانزيټي سړک چې څلور فرعي سړکونه لري، د روان کال تر پايه به بشپړ او ګټې اخيستنې ته وړاندې شي.

محمودراقي- چاريکار (پژواک، ٢٣ غبرګولى ٩٤): د کاپيسا او پروان ولايتونو لپاره ټاکل شوي نوي واليان تر معرفي کېدو وروسته پر خپلو کارونو پيل وکړ.
د کاپيسا په مرکز محمود راقي د غبرګولي په ٢٣مه د نوي والي د معرفي کولو په مراسمو کې د سيمه ييزو ارګانونو د خپلواکې ادارې مرستيال نادر يما، د ولسي جرګې غړو، د ولايتي شورا غړو، ځايي چارواکو او قومي مشرانو برخه اخيستې وه.
د کاپيسا نوي والي سيد محمد خالد هاشمي غونډې ته وويل چې د خپل کار په لومړي پړاو کې به د اداري فساد، د نشه توکو له منځه وړل او قانون د حاکميت په اړه هلې ځلې وي.

محمودراقي (پژواک، ٢٣ غبرګولى ٩٤): د کاپيسا ولايتي شورا وايي چې په تېرو څو مياشتو کې يې د نورو کارونو تر څنګ د خلکو ډېرې شخصي شخړې هوارې کړې دي.
د ولايتي شورا رييس حسين سنجني وايي چې په اوسنۍ دوره کې يې تر اوسه يې د کاپيسا په بېلابېلو سيمو کې ډېرې شخصي دښمنۍ او بدۍ له منځه وړې دي.
د هغه په وينا، د دغه ولايت په مرکز محمودراقي، کوهبند اول او دويم کوهستان کې د خلکو او د قومونو او پخوانيو قوماندانو ترمنځ شخصي بدۍ چې کلونه کلونه پخوا رامنځته وې، هوارې کړې دي.

خوست ښار (پژواک، ١٠ غبرګولى ٩٤): د خوست د ولايتي شورا د تېرې دورې رييس وايي چې که ولسمشر د ولايتونو امنيتي وضعيت ته خپله پاملرنه زياته نه کړي، ښايي هېواد له لا زيات بحراني حالت سره مخ شي.
سيد کريم خاکسار دغه څرګندونې داسې مهال له پژواک خبري اژانس سره په يوې ځانګړې مرکه وکړې چې په دې وروستيو کې په بېلابېلو ولايتوتونو کې د طالب وسله والو بريدونو زور اخيستی دی.
نوموړي وويل چې پر طالبانو سربېره داعش يا د اسلامي دولت ډله هم د هېواد په ګڼو ولايتونو کې د فعاليتونو په حال کې ليدل شوې چې دا د امنيت په برخه کې يو بل جدي ګواښ بلل کېږي.

محمودراقي (پژواک، ٢٤ کب ٩٣): په کاپيسا او پروان ولايتونو کې د ښځو د حقونو فعالانې وايي چې د ملي وحدت حکومت مشران دې مېرمنو او نجونو ته په خپل حکومت کې مهمه ونډه ورکړي.
دغه فعالانې وايي چې د نوي حکومت مشرانو د ټاکنيزو کمپاينونو پر مهال په خپل حکومت کې ښځو ته د ونډې په اړه چې کومې ژمنې يې کړې وې، هغه دې عملي کړي.
په پروان کې د مېرمنو د حقونو فعاله او د دغه ولايت د ښځو چارو رييسه نادره ګياه وايي: ((موږ د ملي وحدت له حکومتي مشرانو غواړو چې مېرمنو ته دې له خپلو ژمنو سره سم په حکومت کې برخه ورکړي.))

محمود راقي (پژواک، ٣ کب ٩٣): د کاپيسا ولايت چارواکي وايي، د يوې نښتې په ترڅ کې څلور دولتي سرتېري وژل شوي دي.
د دې ولايت امنيه قوماندان مل پاسوال خواجه فقير احمد صديقي د کب په ٣مه، پژواک خبري اژانس ته وويل، چې دا نښته نن غرمه مهال د دې ولايت په تګاب ولسوالۍ کې رامنځته شوې وه.
هغه زياته کړه، د دولتي ځواکونو يو کاروان اله ساى ولسوالۍ ته اکمالات کول، چې د تګاب ولسوالۍ په اړوندو سيمو کې، وسله والو پرې بريد کړى او چاودنې هم شوې دي.

محمودراقي ( پژواک، ١٨ سلواغه ٩٣ ) : د کاپيسا ولايت د دويم کوهستان ولسوالۍ اوسېدونکي وايي چې د پوليسو د تشکيل د کموالي له امله يې په سيمه کې امنيت خراب او جنايي جرمونه زيات شوي دي.
دغه راز د دې ولسوالۍ يو شمېر اوسېدونکي وايي چې د شپې له خوا د نامسوولو وسله والو کسانو فعاليتونه زيات شوي او خلک له ماښامه وروسته له کوره نه شي راوتلى.
د دويم کوهستان ولسوالۍ د جمال اغې د سيمې يوه اوسېدونکي پژواک خبري اژانس ته وويل چې غله، او نامسوول کسان تر مازيګر وروسته لارو کوڅو ته راوځي او خلکو ته ستونزې جوړوي.

محمود راقي ( پژواک، ٧ لړم ٩٣ ) : د کاپيسا ولايتي شورا ته بريالي کانديدان وايي ، چې د ټاکنو په پايلو کې ځنډ د پروسې پر روڼوالي هېڅ اغېزه نه ده کړې .

د ټاکنو خپلواک کمېسيون په ټول هېواد کې د ولايتي شوراګانو وروستۍ پايلې د لړم په درېيمه تر اوو مياشتو ځنډ وروسته اعلان کړې.

د کاپيسا ولايتي شورا ته بريالي غړي وايي، سره له دې چې دا پروسه ډېره وځنډېده او خلکوسره داسې اندېښنې وې چې ګواکې د پيسو يا د سياسي معاملو په اساس به ځينې کسان ولايتي شورا ته لار ومومي، خو داسې هېڅ ونه شول.