Faryab د ولايتي شوراګانو ټاکنې

ميمنه (پژواک، ١٦ تله ٩٤): د فارياب د ولايتي شورا رييس وايي چې د دغه ولايت د ګرزيوان ولسوالۍ د طالبانو لاس ته ورغلې ده.
د دې شورا مشر سيد عبدالباقي هاشمي پژواک خبري اژانس ته وويل چې نن مازديګر شاوخوا پنځه بجې د ګرزيوان ولسوالۍ مرکز سرچکان د طالبانو په لاس سقوط وکړ.
ګرزيوان د ميمنې ښار په سل کيلومترۍ کې موقعيت لري چې له سرپل، غور او جوزجان ولايتونو سره ګډه پوله لري.
د فارياب د ولايتي شورا غړي او د ګرزيوان اوسېدونکي صبغت الله سېلاب وايي، سيمه ييز ځواکونه له يو شمېر دولتي ځواکونو سره يو ځاى د ګرزيوان مرکز پرېيښى او د تېښتې په حال کې دي.

ميمنه (پژواک، ١٦ وږى ٩٤): د فارياب د قيصار ولسوالى د شاخ بازار چې د طالبانو د شتون پر مهال د وسلو او نشه يي توکو د پلور مرکز و، بېرته د طالبانو لاس ته ورغلى او امنيتي ځواکونه په کې کلابند شوي دي.
شاخ بازار په اټکليز ډول ٢٠ زره اوسېدونکي لري او درى کاله د طالبانو په ولکه کې و، خو تېره مياشت د جنرال دوستم په مشرۍ د دولتي ځواکونو په چاڼيزو عملياتو کې له طالبانو ونيول شو.
د ځايي چارواکو په خبره، د شاخ بازار درى کاله د طالبانو په واک کې و چې د وسلو او نشه يي توکو پر يوه مرکز بدل شوى و.

مېمنه (پژواک، ١١ وږى ٩٤): فارياب کې د ښځو چارو بنسټونه او ولايتي شورا، که څه هم د تېرې يوې لسيزې په پرتله د ښځو حضور د پام وړ او فعال بولي، خو بيا هم په مهمو سياسي پرېکړو او ټولنيزو فعاليتونو کې د دوى رول پيکه بولي.
دوى وايي چې په افغانستان کې د نوي نظام له رامنځته کېدو وروسته ښځې له بند ازادې شوې، مدرسې او ښوونځي يې پر مخ پرانېستل شول، لسګونه فرهنګي، مدني، حقوقي، حرفوي او رسنيز بنسټونه رامنځته شول، خو نا امنۍ، نرواکي او د دولتي او غيردولتي بنسټونو په اړه د کورنيو بې باورۍ د ښځو حضور پيکه کړى دى.

مزارشريف (پژواک، ٢ وږى ٩٤): د فارياب د قيصار ولسوالۍ د ځينو کليو اوسېدونکي وايي چې په دې ولسوالۍ کې د روانو عملياتو په ترڅ کې د ولسي پاڅون په نوم د وسله والو له سخت او ناوړه چلند سره مخ دي.
دوی د عملياتو په ترڅ کې د ولسمشر د لومړي مرستيال عبدالرشيد دوستم تر قوماندې لاندې د ملي اردو او ملي پوليسو له چلنده خوښ دي خو وايي چې د ولسي پاڅون په نوم وسله والو يې کورونه سوځولي، چور کړي او موټرسايکلونه او نور کاري توکي يې ترې وړي دي.
ځيني بيا د دې ولسوالۍ په خواجه کندو سيمه کې د يادو وسله والو له خوا پر يوې نجلۍ د هغې د کورنۍ پر وړاندې د جنسي تېري کيسه هم کوي.

مېمنه (پژواک ٢٢ زمرى ٩٤): سيمه ييزو چارواکو د فارياب ولايت په قيصار ولسوالۍ کې له طالبانو څخه د خواجه کنتي او شاخ په نومونو د دوه ستراتيژيکو سيمو له نيولو خبر ورکړى دى.
د فارياب ولايت مرستيال او سرپرست عبدالستار بارز وايي چې د ملي اردو په مشرۍ ګډ عمليات پيل شوي او يو ساعت وړاندې يې د خواجه کنتى او شاخ بازار سيمې له ګاونډ سيمو سره نيولې او طالبانو ته يې پکې درنه مرګ ژوبله اړولې ده.
نوموړي د ښکېل لوري د مرګ ژوبلې په اړه معلومات ورنکړل او پژواک خبري اژانس ته يې وويل چې سيمې ته تازه دمي ځواکونه راغلي او په دې اړه يې تر اوسه پورې کره راپور نه دى ورکړى.

زرنج-ميمنه (پژواک، ٢١ غبرګولى ٩٤): په نيمروز کې د ملي امنيت درى کارکوونکي او دوه طالبان او په فارياب کې د شېرين تګاب ولسوالۍ ابتدايه څارنوال ووژل شو.
د نيمروز د امنيې قوماندانۍ د امنيت امر رحمت الله ناصر نن (د غبرګولي ٢١مه) پژواک خبري اژانس ته وويل چې د طالبانو د وسله وال بريد په پايله کې د ياد ولايت د ملي امنيت درې کارکوونکي چې يو يې افسر و، په دلارام ولسوالۍ وژل شوي دي.
هغه وويل چې د ملي امنيت دغه درې منسوبين تېر مازديګر د دلارام په بازار کې پر ګزمه بوخت وو چې پر موټر يې وسله والو طالبانو بريد وکړ او ووژل شول.

ميمنه (پژواک، ٢٧ ورى ٩٤): د فارياب ولايت د سولې عالي شورا مشر مولوي اسدالله جمالي له يوې چاودنې روغ ووت او له دولته يې وغوښتل چې د ده امنيت ونيسي.
د فارياب يوه ولايتي چارواکي د نوم نه اخيستو په شرط پژواک خبري ژانس ته وويل چې ياد ماين تېره ورځ د ميمنې ښار د درېيمې ناحيې په تنوري ساحه کې د مولوي جمالي د کور مخې ته تر يوه پولګټي لاندې اېښودل شوى و او د شپې په اتو بجو وچاودېد.
سرچينه وايي چې ياد بوشکه يي ماين ته د ريموټ له لارې چاودنه ورکړل شوې او د چاودنې له امله يې چا ته زيان نه دى رسېدلى، خو زيانونه يې اړولي دي.