زرنج ( پژواک، ٢٦ چنګاښ ٩٢ ) : د نيمروز ولايت د اوسېدونکو مهمې غوښتنې د څښلو لپاره د پاکو اوبو برابرول، د امنيت ټينګښت او د نشه يي توکو د قاچاق مخنيوى کول دي.
د زرنج ښار يو تن اوسېدونکى ګل احمد وايي، چې دولت دې دوى ته د څښلو لپاره پاکې اوبه برابرې کړي، دوى نور له دولت څخه هېڅ غوښتنه نه لري.
هغه زياتوي ، چې که څه هم په دې ښار کې د هلمند سيند بهيږي، خو دوى ترې ګټه نه شي پورته کولى او ټولې اوبه ايران ته اوړي.
د نوموړي په وينا، خلک په بوشکو کې له ټانکرو څخه اوبه اخلي او يو شمېر بې وزله خلک دغه کار هم نه شي کولى.
