په کابل کې مېشت سکهان او هندوان وايي چې دوی په ټاکنو کې ګډون کوي او له راتلونکي ولسمشر يې غوښتنې، د هندوانو د سوځونې لپاره مناسب ځای جوړول، ماشومانو ته يې په مورنۍ ژبه  د ښوونځيو جوړول او په دولتي دندو کې برخه ورکول، وښودل.
د دغه مذهبي اقليت  شمېره د (۱۳۷۱) له جګړو مخکې ۲۰ زرو ته رسېدله، خو دکورنيو جګړو له امله او د طالبانو د امارت پر مهال د نورو زرګونو خلکو په څېر، دوی هم د خپلو کورنو پرېښودلو ته اړ شول.
همدا ډول د دغه قشر دمسوولينو په وينا، تېر  ٥ کلونه يې شمېره ۵زرو کسانو ته رسېدله، چې اوس يې د بېکارۍ او نورو ستونزو له امله، دغه شمېره ۳زرو ته را ښکته شوې ده.
دوی وايي چې د مجاهدينو له حکومت وړاندې (۱۳۱۷-۱۳۷۵) پورې دوی هېڅ ستونزې نه درلودې او د نورو اتباعو په څېر ارام وو، خو د دوی بدبختي د همدې حکومت له پيل وروسته پيل  شوې ده.
د هندوانو او سکهانو د ډېری خلکو کسب سوداګري، رخت فروشي، يوناني طبابت او دوکانداري ده.
مخکې دوی په بېلابېلو ولايتونو په تېره په کابل، غزني، کندهار، خوست او... کې اوسېدل.
له جګړو وروسته يې پيسه دارو خلکو افغانستان پرېښود، اما بېوزله خلک يې تر اوسه هم  په دې هېواد کې ژوند کوي.
دغه طبقه په ولايتي شوراګانو او ولسي جرګه کې استازي نه لري، خو په مشرانو جرګه کې يو انتصابي سناتور لري.
دغه ګزارش  د زمري مياشتې په وروستۍ اونۍ کې په کابل ښار کې د هغو شپږو تنو د مرکو پربنسټ برابر شوی، چې يوه يې مېرمن ده.
سناتور: زموږ لويه ستونزه په مورنۍ ژبه زده کړه ده
اوتار سنګهـ د سکهانو او هندوانو انتصابي سناتور پژواک خبري اژانس ته وويل، چې په مورنۍ ژبه ښوونځيو، د مړيو سوځولو لپاره  مناسب ځای او سرپنا ته اړتيا لري.
دی وايي چې دوی درمسالونو ته هم اړتيا لري، خو اوس د کارته پروان او د جلال اباد ښار درمسالونه په خطر کې دي او هلته کوم دولتي پلان پلی کېږي.
اوتار سنګهـ وايي چې دوی په ټاکنوکې برخه اخلي او زياته يې کړه:
((موږ له راتلونکي ولسمشر څخه امنيت، سوله، ملي وحدت او برابري غواړو او له راتلونکي دولت غواړو  هغه حق او حقونه، چې مسلمانانو وروڼو ته ورکول کېږي، موږ ته دې هم راکړي.))
انار کلي: کانديدان هندوانو او سکهانو ته هېڅ پروګرام نه لري
د بشري حقونو د خپلواک کمېسيون  کارکوونکې انار کلي هنريار وايي، چې هغه په ټاکنو کې برخه اخلي، خو دې د رياست جمهوري پر کانديدانو نيوکه وکړه.
  دې وويل چې هېڅ يو يې د دغه مذهبي  اقليت په اړه ځانګړی پلان نه لري، آن په خپلو خبرو کې يې له هغوی څخه يادونه، نه ده کړې.
انار کلي وويل  هندوان او سکهان په لوړو دولتي  څوکيو کې دنده نه لري او وايي، چې دوی بايد په دغه پوستونو کې د وړتيا له مخې، په پام کې ونيول شي.
سوندر سنګهـ: ستونزو ته پام نه دی شوی
۲۷ کلن سوندر سنګهـ، چې د کابل په منډيي کې دوکان لري، وايي  چې يو داسې کانديد ته  به رايه ورکړي، چې د بېوزلو خلکو ستونزې هوارې کړي .
 
د ده په وينا،  دتېرو او اوسني حکومت له خوا يې ستونزو ته هېڅ پاملرنه نه ده شوې اوبايد راتلونکی حکومت د دوی ستونزو په تېره د هندوانو د سوځېدنې ځای ته پاملرنه وکړي، ځکه چې دوی  يواځې  دکابل په کلاچه کې د هندوانو د سوځېدنې ځای لري او د سيمې خلک دوی ته مزاحمت کوي.
دوی وايي چې په اسانۍ سره يې د سيمې خلک نه پرېږدي، چې خپل مړي و سوځوي.
هټۍ وال: ژوند خراب شوی دی
۴۲ کلن ورندر سنګهـ د کارته پروان اوسېدنکی، چې ٣ اولادونه لري، اوس د کابل په منډيي کې هټيوال دی وويل، چې په ټاکنو کې به د پام وړ کس ته رايه ورکړي او له هغه څخه غواړي، چې د سکهانو او هندوانو ژوند ته پاملرنه وکړي.
ده زياته کړه: ((موږ په ولسي جرګه کې استازی نه لرو، چې بايد ويې لرو او په دولت کې مو برخه معلومه وي او د هندوانو دسوځونې دځای، د ښوونځيو نشتوالي او سرپنا کې پاملرنه وکړي، چې زموږ  ژوند ډېر خراب دی.))
.د ورندر سنګهـ په وينا، هندوان او سکهان د هېواد  دنورو اتباعو په څېر د مساوي  او برابرو حقونو غوښتونکي دي او د هېواد د نورو ټولو اتباعو  په  څېر بايد د تحصيل او کار زمينه ورته برابره شي.
پنډت: په مورنۍ ژبه تدريس مهمه اړتيا ده
 د جوی شير د درمسال پنډت نرندر سنګهـ،  چې ۴۲ کاله عمر لري او د درېيو اولادونو پلار دی وايي، چې په تېرو ټاکنو کې ېې برخه اخيستې وه او په دې ټاکنو کې هم رايه ورکوي، خو په تېرو ٥ کلونو کې يې په ژوند کې هېڅ مثبت بدلون نه دی راغلی.
دی هم د نور په څېر له ولسمشر غواړي، چې په هندي ژبه دې د دوی اولادونو ته د زده کړې زمينه برابره کړي.
دی وايي چې په مورنۍ ژبه  زده کړه  د ماشومانو حق دی او بايد دغه حق دوی ته ورکړل شي.
استازی: د  هندوانو د سوځېدلو ځای نه لرو
په منډيی کې هټيوال او په شوربازار کې د هندوانو او سکهانو استازی  ۳۸ کلن ارمان سنګهـ ، چې د ۶ اولا دونو پلار دی.
دی وايي چې په ټاکنو کې ګډون کوي اوله راتلونکي ولسمشر څخه غواړي،  هغه خدمت چې مسلمانانو ته يې کوي، دوی ته دې هم وکړي.
ده هم  بنسټېزه ستونزه  د هندوانو دسوځېدنې دځای  وبلله .
ده زياته کړه: ((لکه ماشوم چې د خپلې مور شيدو ته اړتيا لري، موږ هم د هندانو د سوځېدنې ځای ته اړتيا لرو.))
ده زياته کړه: ((موږ چې خپل  مړي سوځوو، خلک وسلې او سوټي راباندې را اخلي، په داسې حال کې چې له جګړو مخکې موږ دغه ستونزه نه لرله.))
ده وويل چې که حکومت د هندوانو او سکهانو ستونزه نه هواروي، نو د دغه مذهب  ټولو خلکو ته  دې له دغه هېواد څخه ځواب  ورکړي.