نیلي (پژواک، ۳۰ غبرګولی ۹۸): په دایکنډي کې د ټاکنو خپلواک کمېسیون ساحوي دفتر وايي چې د تقویتي نوم لیکنې مرکزونو په زیاتولو کې هېڅ صلاحیت نه لري او که خلک په ځانګړې توګه ښځې غواړي چې د ولسمشرۍ په ټاکنو کې ګډون وکړي، باید نوم لیکنه وکړي.
دا په داسې حال کې ده چې پنځه ورځې وړاندې د دایکنډي ځینو اوسېدونکو د تقویتي نوم لیکنې مرکزونو کمښت په اړه د شکایت تر څنګ ویلي وو چې د لارو سختوالي له امله معلول کسان نوم لیکنه نه شي کولی  او په دایکنډي کې د تقویتي نوم لیکنې مرکزونو کمښت معلول نارینه او ښخې له ستونزو سره مخ کړي دي.
د ټاکنو خپلواک کمېسیون ساحوي دفتر د نوم لیکنې مرکزونو کمښت او لرې والي په تړاو د خلکو اندېښنو په پایله کې نن د مدني ټولنې او رسنیو غړو په ګډون د یوې خبري غونډې پر مهال تایید کړه چې د مرکزونو کمښت او لري والی د نوم لیکنې په بهیر کې د خلکو ګډون پر وړاندې لویې ننګونې دي، خو یادونه یې وکړه چې د دوی اړوند دفتر د مرکزونو زیاتولو او کلیو ته د ګرځنده ډلو په استولو کې هېڅ واک نه لري.
په دایکندي کې د ټاکنو خپلواک کمېسیون ساحوي دفتر مشر قاسم قسیم د خلکو ستونزې او اندېښنې مني، خو ویې ویل چې دغه کمېسیون د نوم لیکنې مرکزونو جوړولو او کلیو ته د ګرځنډه ډلو لېږلو په برخه کې هېڅ واک نه لري، بلکې د مرکزي کمېسیون ټاکل شوي پلان له مخې چارې پر مخ وړي.
نوموړي زیاته کړه چې د دایکنډي د رایه ورکوونکو د تقویتي نوم لیکنې لس مرکزونو کې نږدې ۲۲۰۰ کسانو نوم لیکنه کړې ده چې ۸۹۹ تنه یې ښځې دي.
د هغه په وینا، په میش، کیتي، پاتو او اشترلي ولسوالیو کې په ترتیب د نوم لیکنې شمېر لوړ دی او د دې ولایت مرکزنیلي چې تر نورو ولسوالیو ګڼه میشته ده، تر ټولو لږ کسانو نوم لیکنه کړې ده.
په ورته مهال، د دایکنډي ښځوچارو مشرې ذکیې رضايي د رایې ورکوونکو په تقویتي نوم لیکنې بهیرکې د ښځو پیکه ګډون په اړه اندېښنه ښودلې او د مرکزونو کمښت او لرې والی یې د ښځو کم رنګه ګډون لاملونه په ګوته کړي دي.
 نوموړې وویل: ((دایکنډي غرنی ولایت دی، لارې یې سختې دي او ښځې نه شي کولى د نوم لیکنې مرکزونو ته لاړې شي.))
د ښځو حقونو فعالې سودابې موحدي د رایې ورکوونکو نوم لیکنې مرکزونو کمښت په تړاو د اندېښنې څرګندولو ترڅنګ وویل: ((له بده مرغه، د کمېسیون له لوري دایکنډي ته د غوره شوي بهیر له امله، به ددغه ولایت ښځې په ټاکنو کې له سیاسي ګډون څخه بې برخې شي.))