کابل (پژواک،۱۴ سلواغه ۹۷): د جمعیت اسلامي رهبرۍ شورا د ملي اردو د ړنګېدو په اړه د عباس ستانکزي په خبرو غبرګون څرګند کړ او ویې ویل، د یاد ګوند یو شمېر غړي د شخصي ګټو لپاره له ټاکنیزو ټکټونو سره یو ځای شوي دي.
 د راپورونو له مخې، په قطر کې د طالبانو د سیاسي دفتر مرستیال شېرمحمد عباس ستانکزي په خپلو تازه څرګندونو کې ویلي، د سولې په خبرو کې د طالبانو له یو ځای کېدو سره به د امنیتي ځواکونو تشکیل له منځه لاړ شي.
 هغه ویلي: ((د امریکايي ځواکونو له وتلو وروسته به نور دغه سرتېري نه وي، ځکه زما په نظر د امنیتي ځواکونو دا تشکیل امریکا جوړ کړی او کله چې امریکايان له هېواده وځي دوی هم له منځه ځي، ځکه د موجودیت دلیل یې پای ته رسېږي.))
 
 د جمعیت اسلامي د رهبرۍ شورا رییس سید ابراهیم عماد نن په کابل کې د یوې خبري ناستې پر مهال د عباس ستانکزي څرګندونو ته په اشاره وویل: ((ملي اردو د هېواد له رښتینو بچیانو جوړه شوې او زموږ په بدن کې د زړه حیثیت لري او موږ ترې ملاتړ کوو. موږ د حکومت او ملي اردو د له منځه تلو سل سلنه مخالف یو.))
 نوموړي زیاته کړه، افغانان په ځانګړې توګه د جمعیت رهبري شورا به د طالبانو د یادې غوښتنې په اړه چوپ پاتې نه شي.
 عماد وویل: ((له بده مرغه موږ ناځوانه ګاونډیان لرو، امن افغانستان د دوی په ګټه دی، دا د طالبانو غوښتنه نه، بلکې د سیمې د استخباراتو غوښتنه ده... هر ډول قربانۍ ته تیار یو، خو چا ته اجازه نه ورکوو چې زړه مو واخلي.))
 هغه سوله د ملت په خیر وبلله او زیاته یې کړه: ((موږ داسې سوله غواړو چې ملي ګټې او ۱۷ کلنې لاسته راوړنې مو په کې خوندي وي، سوله ملي اړتیا ده او د افغانانو په اړه اجماع هم لري، خو هغې سولې ته چې د پاکستان په ښارونو کې تنظیمېږي اړتیا نه لرو.))
 خو نوموړي هغو راپورونو ته په اشاره چې د لنډمهاله حکومت جوړېدل ګني د سولې د خبرو برخه ده وویل، د دغه ډول حکومت په جوړېدو د تېرو ۱۷ کلونو ټولې لاسته راوړنې له منځه ځي.
 هغه د طالبانو له تحریکه وغوښتل چې له افغانانو سره سوله وکړي، ځکه د ده په خبره په هغه صورت کې چې د ملت څنګ ته رانه شي د ملت په منځ کې به ځای نه شي.
 ده وویل، د جمعیت رهبري شورا تیاره ده چې د سیاسي ډیالوګ له لارې له طالبانو سره تفاهم وکړي.
 عماد زیاته کړه: ((زموږ غوښتنه مخامخ خبرې دي، که دا کار ونه شي خلکو ته ډاډ ورکوم چې د تېر په څېر به د وینې په بیه د خپلو خلکو ملاتړ وکړو.))
 د ده په خبره، د جمعیت اسلامي رهبري شورا یوه پلاوي ته دنده سپارلې چې د کوټې رهبرۍ شورا له پلاوي سره خبرې وکړي.
ټاکنې او ټاکنیز ټګټونه
 عماد د ولسمشرۍ ټاکنو په اړه وویل، تر اوسه د جمعیت اسلامي ګوند یو شمېر غړي د خپلو شخصی ګټو لپاره له ټاکنیزو ټکټونو سره یو ځای شوي او د دوی یو ځای کېدل د رهبرۍ شورا جمعي پرېکړه نه ده.
د جمعیت اسلامي اجرايیه رییس عطامحمد نور، محمد یونس قانوني، محمد اسماعیل خان، بسم الله محمدي، ستار مراد او د جمعیت اسلامي ګوند ځینو نورو غړو د محمد حنیف اتمر له ټاکنیز ټکټ څخه ملاتړ کړی او قانوني په دغه ټکټ کې د اتمر مرستیال ټاکل شوی دی.
 خو د جمعیت اسلامي ګوند رییس صلاح الدین رباني د ګوند له یو شمېر نورو غړو سره یو ځای د ډاکتر عبدالله عبدالله له ټاکنیز ټکټه ملاتړ کړی او د یاد ګوند ځنیو غړو د شیدا محمد ابدالي له ټاکنیز ټکټ څخه ملاتړ اعلان کړی دی.
 
دغه راز د احمدشاه مسعود ورور احمدولي مسعود خپلواک ټاکنیز ټکټ جوړ کړی او د دغه ټکټ په سر کې قرار لري.
 عماد د جمعیت اسلامي په منځ کې پر شته بې اتفاقۍ نیوکه وکړه او ویې ویل: (( که تر یوې میاشتې پورې ستونزې حل نه شوې، کنګره رامنځته کوو، په تېرو ۱۷ کلونو کې تل څو مشخصو څېرو د جمعیت له امتیازونو څخه د شخصي ګټې لپاره استفاده کړې ده.))
 هغه د چا له نوم اخیستو پرته زیاته کړه، چا چې په څوکیو پر جمعیت اسلامي تکیه وهلې او میلیاردران شوي هېڅکله نه غواړي چې کنګره جوړه شي.
 خو د نوموړي په خبره، د کنګرې د جوړېدو طرحه تیاره شوې او له ولسمشرۍ ټاکنو مخکې به ترسره شي.
 عماد وویل، د جمعیت رهبري شورا د هېواد په کچه شاوخوا درې میلیون کسان لري په ولسمشرۍ ټاکنوکې به له داسې ټېم څخه ملاتړ وکړي چې په هېواد کې د سولې د ټینګښت، اقتصاد او له ملي او سیمه ییز بحران څخه د مخنیوي منظم پروګرامونه ولري.
هغه پر ټاکنیزو کمېسیونونو نیوکه وکړه او ویې ویل، دغه کمېسیونونه له دې زیات د باور وړ نه دي او باید حکومتي مشران له سیاسي ګوندونو سره په مشوره یوه حلاره ولټوي او داسې کمېسیونونه جوړ کړي چې ځواکمن او ځواب ورکوونکي وي.

Add new comment

CAPTCHA
This question is for testing whether or not you are a human visitor and to prevent automated spam submissions.

دورستیو خبرونو، فیچرونو ، مرکو ، ویډیو او انځورونو ته دلاسرسي په موخه دپژواک خبري آژانس مبایل اپلکیشن ډانلوډ کړئ.