پل علم (پژواک، د لېندۍ لومړۍ نېټه ٩٧): د لوګر په مرکز پل علم کې د ولسي جرګې د يوه نوماند پلويانو لاريون وکړ او د دغه ولايت د ټاکنو کمېسيون یې پر درغلۍ تورن کړ.
د ولسي جرګې د نوماند شاپور حسن زي پلويانو نن د لېندۍ په لومړۍ نېټه په مرکز پل علم کې لاريون وکړ.
د لاريون کوونکو په استازيتوب نوراجان پژواک ته وويل چې د ټاکنو کمېسيون د دوى قانوني رايې باطلې کړې نو ځکه يې لاريون کړی دی.
هغه وايي: ((زموږ قانوني رايې يې باطلې کړې خو د نورو جعلي او باطلې رايې بيا حسابوي.))
د نوموړي په وينا، د ټاکنو کمېسيون د رايې شمېرنې په پروسه کې درغلي کوي او نور دوى ته اعتبار نه لري.
دغه راز خپله شاپور حسن زي پژواک ته وويل چې د ټاکنو په ورځ له ګڼو امنيتي ستونزو سره- سره خلکو ده ته رايه ورکړې ده.
هغه زياته کړه: ((کمېسيون زموږ قانوني او بايومټريک شوې رايې باطل اعلان کړې، خو نورو چې بيا پيسې ورکړې او روابط لري، د هغوى باطلې رايې هم حساب کړې دي.))
حسن زي ګواښ وکړ که چېرې د ټاکنو  کمېسيون حق، حقدار ته ونه سپاري نو دروازه به يې وتړي.
همدارنګه په دې اړه د لوګر د ټاکنيزو شکايتونو کمېسيون مشر رحمت الله حقمل پژواک ته وويل چې د ټاکنو په کمېسيون کې ستونزې شته؛ ځکه د کمېسيون په اړه تر اوسه له دوى سره ٤٠٦ شکايتونه ثبت شوي دي.
د حقمل په وينا، د څېړنو په پايله کې تر اوسه سلګونه رايې باطلې اعلان شوې او د شپږو محلونو رايې هم قرنطين شوې دي.
ده هم د ټاکنو پر کمېسيون تور پورې کړ او ويې ويل: ((د ټاکنو کمېسيون پر فساد روان دى، په ځينو محلونو کې ځينو نوماندانو رايې نه درلودې خو دوى ورته په ډېټابېس کې رايې رسولې دي.))
بل لور ته د لوګر د ټاکنو کمېسيون چارواکو د يادو څرګندونو په اړه له څه ويلو ډډه وکړه.
خو څه موده وړاندې د ياد کمېسيون مشر عبدالرحمن محب پژواک ته ويلي وو چې ځيني کارکوونکي يې په فساد کې اخته دي او د ځينو مشخصو کانديدانو لپاره کار کوي.
نوموړي دا هم ويلي وو چې ځينو نوماندانو د دوى کمېسيون کارکوونکو ته پيسې ورکړې څو بريالي يې کړي.
د يادونې ده، په ځينو نورو ولايتونو کې هم د ولسي جرګې ځيني نوماندان د خپلو ولايتونو د ټاکنو کمېسيونونه پر درغليو تورنوي او ټينګار کوي چې رايې یې بايد په کابل کې وشمېرل شي.

Add new comment

CAPTCHA
This question is for testing whether or not you are a human visitor and to prevent automated spam submissions.

دورستیو خبرونو، فیچرونو ، مرکو ، ویډیو او انځورونو ته دلاسرسي په موخه دپژواک خبري آژانس مبایل اپلکیشن ډانلوډ کړئ.