تالقان(پژواک ٢٤غبرګولى٩٣):د تخار اوسېدونکو په پراخه کچه په دويم پړاو ټاکنو کې ګډون وکړ  او د ټاکنو ټول مرکزونه پرانيستي وو.

د دويم پړاو ټاکنې په تخار کې ۰۷:۲۰ دقيقې په رسمي توګه پيل شوې؛ خو د دغه ولايت ډېر  شمېر اوسېدونکي له ۰۵:۳۰ څخه د رايې اچونې مرکزونو ته ورغلي وو.
امنيتي چارواکو ډاډ ورکړى وو، چې امنيتي تدابير  يې نيولي او ټاکنې به د امنيت له پلوه خوندي وي.
 د تخار والي عبداللطيف ابراهيمي پژواک خبري اژانس ته وويل، چې د درغليو، ناامنيو او نورو سرغړونو د مخنيوي لپاره يې پوره چمتووالى نيولى وو.
والي وايي:((موږ ټاکنو لپاره پوره چمتوالى نيولى وو، خلکو خپل  برخليک په خپله وټاکه.))
د تخارامنيه قوماندان پاسوال عبدالحنان قطغني پژواک ته وويل،ټول ټاکنېز مرکزونه پرانيستي وو او ټاکنې پرته له امنيتي ننګونو ترسره شوې.
قوماندان وويل،په تخار کې د ۲۱۵ټاکنېزو مرکزونو له ډلې څخه يواځې٣مرکزونه د امنيتي ګواښونو سره مخ وو، چې له ټاکنو مخکې د عملياتو په ترڅ کې خوندي شول.
د تالقانو اوسېدونکي سيدصبغت الله عالمي پژواک ته وويل،د تېرو ټاکنو په پرتله په دويم پړاو ټاکنو کې د خلکو ګډون ښه وو.
ده وويل، چې ډېرو خلکو په ټاکنو کې برخه واخيسته او د خپلې خوښې کاندېد ته يې رايه ورکړه.
د تخار د ټاکنو کمېسيون رييس سيدروح الله موسوي پژواک ته وويل، چې ځينو مرکزونو ته ډېر خلک ورغلل؛ خو په يو شمېر مرکزونو کې د خلکو ګڼه ګوڼه کمه وه.
موسوي وويل، له ماسپښين وروسته د مرکز تالقانو او بهارک ولسوالۍ ۱۳ مرکزونو کې رايې پاڼې خلاصې شوې، چې د ده په وينا، ګرځنده ډلې يې ور ولېږلې او دغه تشه يې ډکه کړه.
تر اوسه په تخار کې د سرغړونو او درغليو رپوټونه نه دي خپاره شوي.
د تخار د ټاکنوکمېسيون د عامه پوهاوي مسوول احمدتميم تلاش پژواک ته وويل،چې په دغه ولايت کې٤ څلور بجې ټاکنې پاى ته رسېدلې دي.
هغه وويل ، نوره اړتيا نشته؛ چې د رايې اچونې وخت وغځېږي
چارواکو ويلي،چې په دې ولايت کې به د ټاکنو بهير د څرنګوالي دقيق معلومات وروسته وړاندې کړي، چې څومره کسانو په کې برخه اخيستې وه او څه ډول ترسره شوې.